Եթե Թրամփն ԱՄՆ նախագահ ընտրվի, Կանադայի համար հեշտ չի լինի. Թրյուդո
Միջազգային
Եթե հանրապետականների թեկնածու Դոնալդ Թրամփը հաղթի նոյեմբերին կայանալիք ԱՄՆ նախագահական ընտրություններում, դա «հետքայլ» կլինի, որը կբարդացնի Կանադայի կյանքը, հայտարարել է Կանադայի վարչապետ Ջասթին Թրյուդոն։
Ձախակողմյան կենտրոնամետ լիբերալ Թրյուդոն, որն իշխանության է եկել 2015 թվականի նոյեմբերին, դժվար հարաբերություններ ուներ Թրամփի հետ, երբ վերջինս նախագահ էր։ 2018 թվականին Թրամփը Թրյուդոյին մեղադրել էր թույլ և անազնիվ լինելու համար, գրում է reuters.com-ը։
«Առաջին անգամ (Թրամփի պաշտոնավարումը-Խմբ.) հեշտ չէր, և եթե երկրորդ անգամ լինի, դա նույնպես հեշտ չի լինի», - ասել է Թրյուդոն Մոնրեալի առևտրի պալատի կողմից կազմակերպված քննարկման ժամանակ:
Կանադան իր ապրանքների և ծառայությունների արտահանման 75%-ն ուղղում է Միացյալ Նահանգներ և հատկապես խոցելի է դեպի պրոտեկցիոնիզմ ԱՄՆ-ի ցանկացած շրջադարձի նկատմամբ:
Երբ Թրամփը եկավ իշխանության, նա խոստացավ վերանայել ազատ առևտրի պայմանագիրը, որը կապում էր Միացյալ Նահանգները, Կանադան և Մեքսիկան: Օտտավան գրեթե երկու տարի անցկացրեց բանակցություններում՝ ստեղծելու եռակողմ պայմանագիր, որը հիմնականում պաշտպանում էր Կանադայի շահերը:
