Ընտրակեղծիքների դեպքում բոլորս միասնական ուժերով պետք է դուրս գանք փողոց․ Անդրանիկ Թևանյան (տեսանյութ)
Политика
«Մայր Հայաստան» դաշինքի առաջնորդ Անդրանիկ Թևանյանը վստահ է, որ փաշինյանական իշխանությունը Երևանի ավագանու՝ սեպտեմբերի 17-ի ընտրություններում վերարտադրության որևէ շանս չունի, բացի ընտրակեղծիքներից:
«Ընտրակեղծիքների դեպքում էլ բոլորս միասնական ուժերով պետք է դուրս գանք փողոց: Բոլո՛րս: Այդ դեպքում արդեն որևէ շանս սրանք չեն ունենա»,-հայտարարեց Անդրանիկ Թևանյանը, ում գլխավորությամբ դաշինքի անդամներն այսօր շրջեցին բուհերով և հանդիպեցին ուսանողներին:
Անդրանիկ Թևանյանը մասնավորապես նշեց.
«Համոզված ենք, որ ընտրողների ակտիվ մասնակցության դեպքում իշխանությունը շանս չունի վերարտադրվելու: Իրենց միակ շանսը մնացել է ընտրակեղծիքը: Այդ ընտրակեղծիքները կանխելու համար պետք է ակտիվ մասնակցենք ընտրություններին, և բոլորին հենց դա էլ կոչ ենք անում: Որևէ շանս այս իշխանությունը չունի, ժողովո՛ւրդ»,-ընդգծեց Անդրանիկ Թևանյանը:
«Մայր Հայաստանի» առաջնորդն ընդտրողներին, ժողովրդին հորդորեց չհավատալ, որ գործող իշխանությունը վերարտադրվելու արդյունքի է հասնելու իր այսպես ասած՝ «տասովշիկներով», փողաբաժանումներով ու ցուցակագրումներով, այդ նախկին մեթոդներով, որ տեսել ենք և որոնք հիմա սրանք ուզում են վերակենդանացնել:
«Միակ կեղծ թեզը, որ իրենք մնացել են իշխանության, դա իբր թե ժողովրդավարությունն է, իբր արդար ընտրություններն են: Բայց այս ընտրություններով հօդս կցնդի դա, եթե հանկարծ իրենք այդ մեթոդին դիմեն: Իսկ դատելով ամենից, հենց դա էլ ուզում են անել»,-նկատեց Անդրանիկ Թևանյանը՝ վերստին շեշտելով, որ ընտրություններին բոլորիս ակտիվ մասնակցության դեպքում հաջողությունն անխուսափելի է լինելու:
Անդրանիկ Թևանյանն անդրադարձավ նաև իշխանության քաղաքապետի թեկնածուին. «Իշխանության քաղաքապետի թեկնածուն բավականին երիտասարդ է: Հասկանալի է, որ երևի ուզում է պաշտոն ունենալ և շարունակել այն, ինչն իրեն դարձրեց այսպես ասած՝ նյութական մեծ հնարավորությունների տեր: Բայց ինքը շանս ունի չդառնալու գործիք՝ Նիկոլ Փաշինյանի ձեռքում և չգնալու ընտրակեղծիքներով ընտրվելու ճանապարհով: Եվ շանս ունի փրկվելու: Իսկ եթե չդիմացավ գայթակղությանը և ընտրակեղծիքներով վերարտադրվեց, ապա Նիկոլ Փաշինյանի հետ համատեղ շատ ծանր ճակատագրի կարող է արժանանալ: Այնպես որ ես կհորդորեի նաև երիտասարդ տարիքում կարիերային հաջողություն արձանագրած այդ թեկնածուին՝ չտրվել գայթակղությանը և չդառնալ գործիք»:
«Մայր Հայաստան» դաշինքի առաջնորդ Անդրանիկ Թևանյանը բոլոր քաղաքական ուժերին, որոնք իրոք ուզում են փոփոխություններ, կոչ արեց միասնաբար գործել:
Միաժամանակ, նա «Մայր Հայաստան» դաշինքի կողմնակիցներին էլ կոչ արեց, ունենալ մեկ թիրախ՝ գործող իշխանությունը՝ Նիկոլ Փաշինյանի գլխավորությամբ, որը նոր պատերազմ, նոր կորուստներ է բերել մեր երկրի գլխին ու շարունակում է այդ կորստաբեր ընթացքը:
«Ես կոչ եմ անում չտրվել սադրանքների, չտրվել էմոցիաներին, նախկինում ունեցած ինչ-ինչ հարցերը թողնել մի կողմ և միասնաբար պայքարել այս ռեժիմի դեմ»,-հայտարարեց Անդրանիկ Թևանյանը:
