Մոնղոլիայում անոմալ սառնամանիքների պատճառով սատկել է ավելի քան 4,7 միլիոն կենդանի

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կարմիր Խաչի և Կարմիր մահիկի ընկերությունների միջազգային ֆեդերացիան (IFRC) հայտնել է, որ Մոնղոլիայում ձմռանը սատկել է ավելի քան 4,7 միլիոն կենդանի՝ վերջին 50 տարվա ամենասարսափելի սառնամանիքների պատճառով:

Ձուդի (բնական երևույթ է, որի ժամանակ կրիտիկական ցածր ջերմաստիճանի և առատ ձյան ծածկի պայմաններում անասունները չեն կարողանում սնվել) պատճառով վտանգի տակ է դրվել հազարավոր տեղի բնակիչների սննդի մատակարարումը, գրում է CNN-ը։

Ձմռան սկզբին Մոնղոլիայում կտրուկ տաքացել է, որից հետո կտրուկ ցրտել է և հալած ձյունը սառույցի կեղև է ձևավորել։ Հանրապետության որոշ շրջաններում ջերմաստիճանը նվազել է մինչև -40°։ Ձյան տեղումները ռեկորդային են եղել 49 տարվա ընթացքում և ծածկել Մոնղոլիայի տարածքի 90%-ը։ Այս պայմաններում կենդանիները չեն հասցրել ճարպ հավաքել, իսկ հովիվները չեն կարողացել բավականաչափ խոտ պատրաստել։

«Մարդիկ, որոնց գոյատևումն ամբողջությամբ կախված է իրենց անասուններից, ընդամենը մի քանի ամսում հայտնվել են աղքատության մեջ... Նրանցից ոմանք այժմ այլևս չեն կարողանում կերակրել իրենց կամ տաքացնել տները», - ասել է IFRC Ասիա-Խաղաղօվկիանոսյան տարածաշրջանի տնօրեն Ալեքսանդր Մատեուն:

Կազմակերպության տվյալներով՝ ձմռանը հովիվների 2,2 հազար ընտանիք կորցրել է իր անասունների մոտ 70%-ը։ Ավելի քան 7 հազար ընտանիք կորցրել է սննդի կայուն հասանելիությունը։ Մոնղոլիայի կառավարությունը բարձր տագնապային վիճակ է հայտարարել մինչև մայիսի կեսերը, երբ երկրի շրջաններում եղանակը կսկսի բարելավվել։