Վճռական մարտը` Երևանում. «Գորշ կարդինալին» սպասելիս
Քաղաքականություն
Երևանի քաղաքապետարանի համար «մարտերը» դեռ չեն սկսել, բայց ապագա օպոնենտները արդեն ուրվագծվում են։ Իհարկե, «կինդեր սյուրպրիզները» դեռևս չեն բացառվում, բայց թևերից մեկում ամեն ինչ ավելի քան հստակ է` իշխանական բևեռի դրոշակը վերցրել է Տիգրան Ավինյանը։
Ավինյանը բավականին հայտնի, բայց, միաժամանակ, մութ կերպար է։ Համարվում է իշխանության գորշ կարդինալը, մերթ ընդ մերթ ամենածավալուն գործարքներում հնչում է իր անունը ու... վերջ։ Չի խոսում, գրառումներ չի անում, սկանդալիստ չէ, բայց իշխանության ներսում մեծ կշիռ ու ազդեցություն ունի։ Հավանաբար հենց դա է պատճառը, որ իշխանության համար այս կենաց մահու կռիվը հենց նրան է վստահվել։
Իսկ որ սա իշխանության համար կենաց մահու կռիվ է` աներկբա է։ Իշխանության` ժամ առ ժամ գահավիժող վարկանիշի, ուկրաինական ճգնաժամի հետևանքով ուրվագծվող տնտեսական աղետի և օրեցոր երկրում խորացող քաղաքական ճգնաժամի ֆոնին «գորշ կարդինալի» մուտքը ակտիվ խաղի մեջ մի բան կարող է նշանակել։ Երևանի քաղաքային ընտրությունները այլևս մունիցիպալ ընտրություններից դառնում են վճռորոշ ճակատամարտ։
Կամ իշխանության նավը կխորտակվի, կամ խարիսխ կգցի Երևանում` նոր ուժային կենտրոններով ու նոր խաղացողներով։
Արտակ Սարգսյան
