Չորս գյուղերի համար քավության նոխազ են գտել
Քաղաքականություն
Տավուշի 4 գյուղերի հանձնումը Ադրբեջանին ուղեկցվելու է բողոքի լայն գործողություններով, հանրային ալիքով թե՛ Երևանում և թե՛ Տավուշի մարզում։
Բնականաբար, գործող վարչախումբը հրաշալի հասկանում է, որ անգամ սեփական սպասարկուների միջոցով կեղծիքներ տարածելով և փորձելով համոզել, թե ոչինչ չեն հանձնում Ադրբեջանին, հնարավոր չէ երկար պահել, և իրավիճակից դուրս գալու ելքեր են փնտրում։
Ինչպես և սպասելի էր «Քաղաքացիական պայմանագրի» դեպքում, առաջին հերթին մտադիր են քավության նոխազ գտնել և նրա գլխին ջարդել կատարվածը։ ՔՊ մեր աղբյուրի փոխանցմամբ՝ երեկ ԱԳՆ հայտարարությունից և կառավարության անհեթեթ պարզաբանումից հետո, երբ բողոքի ալիք է սկսվել հատկապես Տավուշի մարզում, Նիկոլ Փաշինյանը վարչության նիստ է գումարել, ընդ որում, որպեսզի կասկածանքից հեռու մնա, վարչության նիստը գումարվել է առցանց ձևաչափով, ինչպես դա ՔՊ-ն անում էր կորոնավիրուսի համավարակի ժամանակ։
Մեր աղբյուրի փոխանցմամբ՝ մասնավորապես որոշվել է 4 գյուղերի հանձնման պատասխանատու կարգել փոխվարչապետ Մհեր Գրիգորյանին և ֆորս մաժորի դեպքում հենց նրա գլխին ջարդել ողջ պատասխանատվությունը՝ հայտարարելով , թե Մհեր Գրիգորյանն է դրա պատասխանատուն։
Առավել ևս, որ արտգործնախարար Արարատ Միրզոյանն ավելի վաղ Ազգային ժողովում դրա նախադրյալները դրել էր՝ հայտարարելով, որ եթե Մհեր Գրիգորյանը հրաժարվի ադրբեջանական կողմի պահանջներից , ապա սահմանազատման հանձնաժողովի նիստում Շահին Մուսաֆաևը կարող է ատրճանակով սպառնալ, կամ ընդհուպ գնդակահարել նրան։
Այս կերպ իշխանությունը փորձելու է Մհեր Գրիգորյանին միաժամանակ թե՛ զոհ, թե՛ պատասխանատու կարգել՝ նրանից ազատվելու նպատակով։
Լեյլա Նուրբեկյան
