Միայն ՀՀ տարածքից ադրբեջանական ԶՈւ-երի դուրսբերումը և գերիների վերադարձը կարող են պայմաններ ստեղծել առաջացող հարցերը դիտարկելու համար․ Մհեր Գրիգորյան
Ալտերնատիվ կարծիք
Փոխվարչապետի պաշտոնակատար Մհեր Գրիգորյանը մասնակցել է Մինսկում կայացած ԱՊՀ մասնակից պետությունների կառավարությունների ղեկավարների խորհրդի նիստին:
Այս մասին հայտնում է կառավարության մամուլի ծառայությունը։
«Մհեր Գրիգորյանը նիստի ընթացքում հանդես է եկել ելույթով, որում մասնավորապես նիստի մասնակիցների ուշադրությունը կենտրոնացրել է հայ-ադրբեջանական սահմանին տեղի ունեցող իրադարձությունների վրա՝ նշելով, որ այն ինչ այսօր կատարվում է հայ-ադրբեջանական սահմանին իր մեջ կրում է ակնհայտ սպառնալիքներ ամբողջ տարածաշրջանի և ի վերջո բոլորիս համար:
Փոխվարչապետի պաշտոնակատարը նաև ընդգծել է, որ միայն Հայաստանի Հանրապետության սուվերեն տարածքից ադրբեջանական զինված ուժերի անհապաղ ու առանց վերապահումների դուրսբերումը, ինչպես նաև մեր գերեվարված զինծառայողների վերադարձը կարող է պայմաններ ստեղծել առաջացող հարցերը քաղաքական-դիվանագիտական գործիքակազմի շրջանակներում դիտարկելու համար»,- ասված է հայտարարության մեջ:
