Խաղաղ օվկիանոսի հատակին գտել են «ճանապարհ դեղին աղյուսից»

Ջրի տակ ավելի քան մեկ կիլոմետր խորությունում գիտնականները հայտնաբերել են «դեղին աղյուսից ճանապարհ» հիշեցնող արտասովոր կառուցվածք։ Անսպասելի գտածոն հայտնաբերել է արշավախումբը Հավայան կղզիներում, պարզվել է, որ դա հազվադեպ երկրաբանական երեւույթ է։ Այս մասին տեղեկացրել է ScienceAlert պորտալը։

 Հետազոտությունը կատարվել է Papahānaumokuākea Marine National Monument ծովային արգելոցում, որն աշխարհի ամենամեծ պահպանվող օվկիանոսային շրջաններից մեկն է, որի հատակի մեծ մասը մնում է չուսումնասիրված։

Լիլիուոկալանի ստորջրյա լեռան գագաթին E/V Nautilus հետազոտական ​​նավի գիտնականները նկատել են տարօրինակ «չորացած» տարածք, որը ծածկված էր գրեթե ճիշտ ուղղանկյուն ձեւեր գոյացնող ճեղքերով։

Արշավախմբի անդամների խոսքով՝ դա նման էր սալարկված ճանապարհի։ «Սա Ատլանտիդա տանող ճանապարհն է»,- կատակել է հետազոտողներից մեկը հեռարձակման ժամանակ։

Սակայն երեւույթն ունի միանգամայն երկրային բացատրություն։ Օբյեկտը հիալոկլաստիտ է՝ հրաբխային ապար, որը ձեւավորվել է ուժեղ ստորջրյա ժայթքումների ժամանակ։ Երբ տաք լավան արագ սառչում է, դրա վրա ճաքեր են առաջանում, որոնք երբեմն ձեւավորում են երկրաչափորեն ճիշտ նախշեր։

Գիտնականները նշել են, որ «աղյուսե շարվածքը» ստեղծվել է տաքացման եւ սառեցման կրկնվող ցիկլերի միջոցով։ Արդյունքում՝ ապարում ճաքեր են առաջացել մոտ 90 աստիճան անկյան տակ՝ ստեղծելով արհեստական ​​կառույցի պատրանք։

Չնայած տպավորիչ տեսքին՝ հայտնագործությունն օվկիանոսի հատակի միակ առեղծվածը չէ։ Հետազոտողների գնահատմամբ՝ մարդկությունը մինչ այժմ վիզուալ ուսումնասիրել է խորջրյա տարածքների միայն մի փոքր մասը՝ ընդհանուր մակերեսի մոտ 0.0006–0.001 տոկոսը։

Ինչպես նշել են գիտնականները, նման տարածքների ուսումնասիրությունն օգնում է ավելի լավ հասկանալ Երկրի երկրաբանությունը եւ կյանքը օվկիանոսի խորքերի էքստրեմալ պայմաններում։