Էներգետիկ արդյունաբերությունը Գերմանիայում. ավելի շատ արև, ավելի շատ վերականգնվող էներգիա

Dw.com-ը գրում է, որ Գերմանիան չափազանց հարուստ է արևոտ օրերով։ Ուստի, կան բոլոր հնարավորությունները գերմանական արևային էներգիան զարգացնելու համար։ Մայիսին Գերմանիայում տեղադրված ֆոտոգալվանային վահանակներն ավելի շատ էլեկտրաէներգիա են արտադրել, քան երբևէ՝ ավելի քան 8,8 միլիարդ կՎտ/ժ:

2023 թվականի առաջին կիսամյակին վերականգնվող էներգիայի մասնաբաժինը գերազանցել է 52%-ը:

Վերականգնվող էներգիայի ավելի մեծ տեսակարար կշիռ գերմանական էներգետիկ արդյունաբերությունում գրանցվել է միայն մեկ ամսվա ընթացքում. 2022 թվականի փետրվարին այն կազմել է 62% հատկապես ուժեղ քամիների պատճառով: Այդ ռեկորդը մեծապես նպաստել է նրան, որ անցյալ տարի վերականգնվող էներգիան ապահովել է Գերմանիայում առաջին վեց ամիսների ընթացքում սպառված ողջ էլեկտրաէներգիայի 49%-ը։

Նման տվյալներ են հրապարակել հունիսի 27-ին Բադեն-Վյուրտեմբերգ դաշնային նահանգի (ZSW) Արևային էներգիայի և ջրածնի հետազոտական ​​կենտրոնը և Էներգետիկ և ջրամատակարարող ընկերությունների դաշնային ասոցիացիան (BDEW): «Այն փաստը, որ մենք այսօր մեր էլեկտրաէներգիայի կեսից ավելին ստանում ենք վերականգնվող աղբյուրներից, հավանաբար անհավատալի էր թվում քսան տարի առաջ», — ասել է BDEW-ի գլխավոր տնօրեն Քերսթին Անդրեեն:

Իսկ ընդհանուր առմամբ, գերմանական վերականգնվող էներգիայի աղբյուրներն այս տարվա առաջին կիսամյակում արտադրել են մոտ 138 միլիարդ կվտ/ժամ էլեկտրաէներգիա՝ գրեթե նույնքան, ինչ նախորդ տարվա առաջին կիսամյակում։ Այդ մասնաբաժինը առաջին հերթին բացատրվում է Գերմանիայում էլեկտրաէներգիայի արտադրության 11%-ով կրճատմամբ։ Դա պայմանավորված է ձեռնարկությունների և բնակչության կողմից էներգիայի խնայողության լայնածավալ միջոցառումներով, Գերմանիայի տնտեսության տեխնիկական անկմամբ, ինչպես նաև ապրիլին գերմանական ատոմակայանների վերջին երեք բլոկների փակմամբ:

Գերմանիայում հողմային էներգիայի զարգացումը կանգ է առնում:

Այն փաստը, որ գերմանական վերականգնվող էներգիայի արտադրության ծավալները մնացել են նախորդ տարվա նույն ժամանակահատվածի մակարդակին, մի կողմից ցույց է տալիս, որ վերականգնվող էներգիայի աղբյուրները Գերմանիայում դարձել են էլեկտրաէներգիայի կայուն մատակարար։ Միևնույն ժամանակ, քամին և արևային էներգիան գնալով լրացնում են միմյանց. կա՛մ քամին է ապահովում բարձր և նույնիսկ ռեկորդային ծավալներ, կա՛մ արևը:

Մյուս կողմից, արտադրության լճացած ծավալները ցույց են տալիս, որ վերականգնվող էներգիայի հզորության զգալի աճը, որը ծրագրել է Գերմանիայի կառավարությունը՝ արագացնելու հանածո էներգիայի աղբյուրների հեռացումը, ակնհայտորեն կանգ է առնում:

ZSW-ի գործադիր տնօրեն, պրոֆեսոր Ֆրիտյոֆ Շտայսը նշել է. «Հաշվի առնելով, որ մինչև 2045 թվականը կլիմայական չեզոքության հասնելու համար էլեկտրաէներգիայի արտադրությունը պետք է ամբողջությամբ ապահովվի վերականգնվող աղբյուրներից արդեն 2035 թվականին, պարզ է դառնում, որ կարողությունների հետագա աճը պետք է տեղի ունենա շատ ավելի արագ, քան նախքինում»:

Այնուամենայնիվ, հողմային տուրբինների տեղադրումը ցամաքում և հատկապես ծովում առայժմ կանգ է առնում, թեև հողմակայաններն են, որ տեսանելի ապագայում պետք է դառնան «կանաչ» էլեկտրաէներգիայի հիմնական մատակարարը ողջ Եվրամիության համար։

Իսկ արեգակնային էներգիայի աճն ապահովել են տների սեփականատերերը: Գերմանիայում արագ տեմպերով զարգանում է ֆոտոգալվանային համակարգը, որն այս տարի էլ ավելի է արագացել։ Այդ մասին է վկայում հունիսի 27-ին հրապարակված «Կանաչ էլեկտրաէներգիայի ատլաս 2023»-ը։ Շվեյցարական Prognos AG վերլուծական և խորհրդատվական ընկերության այդ ուսումնասիրությունը մանրամասն վերլուծում է Գերմանիայում վերականգնվող էներգիայի աղբյուրների զարգացումը և արտադրող հզորությունների տեղակայման աշխարհագրությունը:

Prognos AG-ի կողմից հավաքված տվյալները ցույց են տալիս, թե որքան մեծ առաջընթաց է գրանցել գերմանական արևային արդյունաբերությունը վերջին ժամանակներում: Ըստ Atlas-ի, 2020 թվականից մինչև 2023 թվականի մայիսի 31-ը Գերմանիայում ֆոտովոլտային վահանակների դրված հզորությունը 50 գիգավատից հասել է ավելի քան 72 գիգավատի: Համեմատության համար ասենք, որ նոր ատոմակայանի մեկ էներգաբլոկի հզորությունն այսօր, որպես կանոն, կազմում է 1-ից մինչև 1,4 ԳՎտ։ Այսպիսով, վերջին երեք տարիների ընթացքում Գերմանիայում տեղադրված արևային մարտկոցները տեսականորեն ունակ են արտադրել այնքան էլեկտրաէներգիա, որքան առնվազն 15 ատոմակայան։

Ամենազարմանալին այն է, որ հզորության հիմնական աճն ապահովել են ոչ թե էներգետիկ ընկերությունները դաշտերում կամ բլուրներում գտնվող իրենց մեծ արևային էլեկտրակայաններով, այլ տների սեփականատերերը: Ըստ Prognos AG-ի՝ բաց տարածքում արևային մարտկոցների ընդհանուր հզորությունը վերջին երեք տարիների ընթացքում ավելացել է 7 ԳՎտ-ով, մինչդեռ 15 ԳՎտ հզորությամբ մարտկոցներ տեղադրվել են հիմնականում բնակելի շենքերի տանիքներին և ճակատներին։

Արևային պանելների տեղադրմանն անկասկած հզոր խթան է տվել 2021-2022 թվականների գազային ճգնաժամը, որը առաջացել է Ռուսաստանից մատակարարումների կրճատմամբ, այնուհետև ամբողջական դադարեցմամբ և էլեկտրաէներգիայի գների հետագա աճով։

Այժմ աճող թվով գերմանացիներ են ցանկանում գոնե մասամբ պաշտպանվել հանածո էներգիայի հեռավոր և անվստահելի աղբյուրներից, հատկապես, որ դրանք վնասակար են կլիմայի համար և մարդիկ արտադրում են որոշակի քանակությամբ «կանաչ» էլեկտրաէներգիա հենց տանը: Շատ խոսուն փաստ է այն, որ միայն 2023 թվականի հունվարի 1-ից մինչև մայիսի 31-ը Գերմանիայում արևային մարտկոցների դրվածքային հզորությունն ավելացել է 4,9 ԳՎտ-ով։

Կլիմայի փոփոխությունը խթանում է ֆոտոգալվանային էներգիան և ահա արդյունքը. Prognos AG-ի տվյալներով Գերմանիայում արևային մարտկոցների ընդհանուր հզորությունը մինչև 2023 թվականի մայիսի 31-ը հասել է 72,5 ԳՎտ-ի: Դա զգալիորեն գերազանցում է հողմային տուրբինների հզորությունը ցամաքում (59 ԳՎտ) և ծովում (8,4 ԳՎտ) միասին վերցրած:

Այնուամենայնիվ, քամին եղել և կշարունակի մնալ Գերմանիայում էներգիայի վերականգնվող հիմնական աղբյուրը (նրա մասնաբաժինն էլեկտրաէներգիայի արտադրության մեջ ավելի քան երկու անգամ գերազանցում է արևին), հատկապես այն պատճառով, որ այն տեսականորեն փչում է շուրջօրյա, մինչդեռ արևը փայլում է լավագույն դեպքում կես օր և հիմնականում գարնանը և ամռանը: Այնուամենայնիվ, հողմային տուրբինների տեղադրումը պահանջում է զգալիորեն ավելի մեծ թվով շինարարական թույլտվություններ և տեխնիկապես շատ ավելի դժվար է, քան արևային մարտկոցների տեղադրումը:

Այնուամենայնիվ, ZSW-ի և BDEW-ի կողմից գրանցված 2023-ի առաջին կիսամյակի «արևային ռեկորդները» ցույց են տալիս, որ ֆոտոգալվաններն արդեն իսկ կարևոր դեր են խաղում Գերմանիայի էլեկտրաէներգիայի մատակարարման մեջ և ապագայում էլ ավելի նշանակալի գործոն կդառնան։

Հայաստանում արևային պանելներ արտադրող առաջին և միակ ընկերությունը Սոլարոնն է։ Տեղադրե՛ք SolarOn արևային կայան և զրոյացրեք էլեկտրաէներգիայի ծախսը

Գրե՛ք կամ զանգահարեք և ստացեք անվճար հաշվարկ Ձեզ անհրաժեշտ արևային կայանի հզորությանն ու արժեքի վերաբերյալ։

Զանգահարեք 8757, 010 440055

էլ. փոստ ֊ Info@solaron.am