Ucom-ը և Գործատուների միությունը համագործակցության հուշագիր են ստորագրել

Ucom-ը և Հայաստանի գործատուների հանրապետական միությունը (ՀԳՀՄ) համագործակցության հուշագիր են ստորագրել՝ միավորելով ջանքերը կրթության և աշխատաշուկայի միջև կապի ամրապնդման, մասնագիտական հմտությունների զարգացման և գործատուների մրցունակության բարձրացման ուղղությամբ։

Հուշագիրը ստորագրեցին Ucom-ի գլխավոր տնօրեն Ռալֆ Յիրիկյանը և Հայաստանի գործատուների հանրապետական միության նախագահ Վահագն Համբարձումյանը։

Համագործակցության առանցքային ուղղություններից է աշխատանքի վրա հիմնված ուսուցման զարգացումը։ Կողմերը նախատեսում են աջակցել ուսանողների գործնական հմտությունների ձևավորմանը, մասնագիտական պրակտիկայի հնարավորությունների ընդլայնմանը և գործատուների ու կրթական հաստատությունների միջև համագործակցության ամրապնդմանը։ Նախատեսվում է նաև համատեղ նախաձեռնությունների իրականացում՝ ուղղված երիտասարդների թվային հմտությունների զարգացմանը, մասնագիտական կողմնորոշմանը և աշխատաշուկայի պահանջներին համապատասխան կարողությունների ձևավորմանը։

«Ucom-ում մեզ համար կարևոր է, որ տեխնոլոգիական զարգացումը զուգորդվի մասնագիտական կարողությունների զարգացմամբ։ Այսօր աշխատաշուկան արագ փոխվում է, և երիտասարդներին անհրաժեշտ են ոչ միայն տեսական գիտելիքներ, այլև գործնական հմտություններ ու իրական աշխատանքային միջավայրի հետ շփվելու հնարավորություններ։ Այս համագործակցությամբ ցանկանում ենք նպաստել կրթության և բիզնեսի միջև կապի ամրապնդմանը՝ միաժամանակ մեր տեխնոլոգիական փորձն ու հնարավորություններն ուղղելով գործատուների իրական կարիքներին համապատասխան լուծումների զարգացմանը», - նշեց Ucom-ի գլխավոր տնօրեն Ռալֆ Յիրիկյանը։

Համագործակցությունը ներառում է նաև փորձի փոխանակում, համատեղ սեմինարների և գործարար հանդիպումների կազմակերպում, ինչպես նաև նախաձեռնություններ կանաչ տեխնոլոգիաների կիրառման, ռեսուրսների արդյունավետ օգտագործման և շրջակա միջավայրի պահպանության ուղղություններով։

«Երկկողմ համագործակցությունը փոխադարձ արժեք կստեղծի՝ նպաստելով ինչպես Ucom-ի շահերի ներկայացմանը պետություն–մասնավոր հատված երկխոսության հարթակներում և ոլորտային քննարկումներում, այնպես էլ գործարար համայնքի հետ փոխգործակցությանը՝ հնարավորություն ստեղծելով բացահայտել բիզնեսի կարիքներն ու զարգացման առաջնահերթությունները, ինչպես նաև ընկերության տեխնոլոգիական և թվային լուծումները ներկայացնելու գործարար շրջանակներին», -ասաց ՀԳՀՄ նախագահ Վահագն Համբարձումյանը։ 

Ucom-ը և ՀԳՀՄ-ն  նախատեսում են զարգացնել «բիզնես–տեխնոլոգիա–կրթություն» համագործակցության նոր ձևաչափեր՝ նպաստելով մարդկային կապիտալի զարգացմանը, նորարարական լուծումների կիրառմանը և բիզնեսի երկարաժամկետ մրցունակության բարձրացմանը։