Փաշինյանը կարող էր ասել, որ իր թվարկած հարցերը նախատեսվել են դեռևս 2017 թ․-ին հաստատված ծրագրով․ Արտակ Զաքարյան
ՀՀ պաշտպանության նախկին փոխնախարար Արտակ Զաքարյանը ֆեյսբուքյան էջում գրել է՝
Ասուլիս, թե՞ փաստերի խեղաթյուրման հարթակ
Փաշինյանական հերթական ասուլիսի վերաբերյալ կարելի է ժամերով խոսել։ Գրեթե բոլոր հայտարարություններն ակնհայտ վիճարկելի են, բայց դրա իմաստը չկա։ Նիկոլ Փաշինյանի նպատակն է, որ իր երևակայական վիճակագրությամբ շեղի քաղաքական ուշադրության հիմնական թեմաները՝ արցախյան հարցից, ձախողված հակահամաճարակային կառավարումից ու աճող սոցիալական պրոբլեմներից։
Այնուամենայնիվ հարկ եմ համարում պաշտպանական ոլորտին վերաբերող մի շարք ճշգրտումներ մտցնել։ Առաջնագծում կատարված աշխատանքների մասին զեկուցող Փաշինյանը վստահ եմ գաղափար անգամ չունի, թե ի՞նչ է կրակակետը, դիտարկման սարքավորումը, ջերմատեսիլ սարքը և այլն։ Գրել տվել են, ինքն էլ ջանասիրաբար ընթերցում էր։ Բայց դա դեռ ոչինչ։ Քաղաքական առումով՝ Փաշինյանը կարող էր մի փոքր ազնվություն ունենար, և ասեր, որ իր թվարկած հարցերը մանրամասն նախատեսվել են դեռևս 2017թ․ ՊՆ և ԳՇ կողմից մշակված, ու 2018թ․ նախագահ Սերժ Սարգսյանի կողմից հաստատված «ԶՈւ արդիականացման 2018-24թթ ծրագրով»։
Բայց ո՛չ։ Իր ոճին համապատասխան, քանի դեռ կան միամիտներ ու մոլորյալներ, ուրեմն կարելի է նաև սեփական անձին վերագրել ամեն ինչ։ Ի՞նչ կարիք կա ընդգծելու, որ մարտական հենակետերի ջրաֆիկացման ծրագիրը սկսվել է դեռևս 2014թ․-ին, և ամեն տարի ավելացել է ջրաֆիկացված դիրքերի քանակը։ Կարծում եմ, դեռ պատգամավոր ժամանակ ինքն անձամբ տեսել է այդ ծրագրի իրականացման ընթացքը։
Իհարկե չի՛ ասի, որ դիրքերում արևային մարտկոցների տեղադրումն ու կիրառումը սկսվել է դեռևս 2016թ․-ից, ու յուրաքանչյուր տարի՝ ըստ ծրագրի ընդլայնվում է։
Իհարկե, չի՛ ասի, որ զինվորական ինժիներական և ավտոմոբիլային տեխնիկան ամբողջության վերաթարմացնելու ծրագիրը սկսվել է կյանքի կոչվել 2016թ-ից՝ ռուսական առաջին մեծ վարկի շրջանակներում և այլն, և այլն։ Այո, եղել են իրավիճակներ, որ լայնածավալ ինժիներական աշխատանքնրում ներգրավվել են նաև քաղացիական կազմակերպությունների ու անհատների ինժիներական տեխնիկան։ Եվ դա անհրաժեշտություն է, այնպես, ինչպես ամբողջ աշխարհում քաղաքացիական բոլոր տիպի տեխնիկաններն և տրանսպորտային միջոցները հաշվառվում են, և պետք եղած ժամանակ ներգրավվում են ինժիներական և ամրաշինական աշխատանքներում։
Այնպես, որ պարոն Փաշինյան, մարդկանց աչքերին թոզ փչելիս հաշվի առ նաև, որ երկրում և երկրից դուրս լսում են տարբեր ռանգի մարդիկ, ովքեր ձեր մասին կարծիք կազմելով՝ ցավոք կարծիք են կազմում նաև Հայաստանի մասին։ Եթե այսօրվա եսասիրությունից դրդված կեղծումները՝ ձեզ համար ավելի կարևոր են, քան վաղվա համերաշխ ճշմարտությունը, ուրեմն հանուն վաղվա Հայաստանի, այսօր արդեն պետք է մտածեք ձեր քաղաքական նահանջի մասին։
Հ․Գ․ Ինչ վերաբերում է մարտական հերթապահության ընթացքում տրամադրվող շշով ջրին (փաստ 89), որը Նիկոլը համարյա դարձրեց օպերատիվ-մարտավարական նշանակության խնդիր՝ չգիտեմ, թե ում խորհրդով է արվել, բայց․
ա/ դրա համար ամբողջ աշխարհում կիրառում են հատուկ զինվորական տափաշիշ, որը պրակտիկ է բոլոր առումներով,
բ/ կամ էլ ինչպես Միաքայել Մինասյանն էր ասում, նման կերպ ինչ որ մեկի ջրի բիզնեսը բանակում սղացնելու խնդիր է լուծվել։
Առողջ եղեք բոլորդ, Աստված պահապա՛ն մեր երկրին ու ժողովրդին։
