Ավագ սերնդին արժանապատիվ ծերություն ապահովելը ողորմություն չէ, դա մեր պարտքն է. Հրայր Կամենդատյան

Անվճար տրանսպորտ թոշակառուներին։հարգարժա՛ն Երևանցիներ,

Այսօր մենք ականատես ենք լինում մի իրավիճակի, որը ոչ միայն տնտեսական անհեթեթություն է, այլև բացահայտ սոցիալական անարդարություն։

Երևանում բնակվում է շուրջ 150 000 կենսաթոշակառու։ Նրանցից մոտ 120 000-ը ստիպված է ամսական 6500 դրամ վճարել «զեղչված» տրանսպորտային փաթեթի համար։

Մեկ պարզ հաշվարկ․

* Ամսական կտրվածքով մեր թոշակառուների գրպանից կորզվում է 700 միլիոն դրամ։

* Տարեկան կտրվածքով դա կազմում է 8,5 միլիարդ դրամ։

8,5 միլիարդ դրամ՝ նրանցից, ովքեր իրենց ամբողջ կյանքն ու քրտինքն են դրել այս քաղաքի ու այս պետության շենացման գործում։

Ինչո՞ւ։ Ինչո՞ւ է քաղաքային իշխանությունը որոշել, որ տարեց մարդը, որի միջին թոշակը հազիվ բավարարում է տարրական դեղորայքին ու կոմունալ վճարներին, պետք է տարեկան տասնյակ հազարավոր դրամներ վճարի ընդամենը հարազատին այցելելու, բուժկենտրոն կամ դեղատուն հասնելու համար։

Սա «արտոնություն» չէ, սա ծաղր է սոցիալական պետության ideayi նկատմամբ։ Քաղաքային բյուջեում գտնվում են միլիարդավոր դրամներ տարատեսակ անարդյունավետ ծախսերի, ճոխությունների ու PR ակցիաների համար, բայց երբ հարցը վերաբերում է ավագ սերնդին, համակարգը դառնում է անխիղճ հաշվիչ։

Մեր պահանջը հստակ է և անսակարկելի․

* Տրանսպորտը թոշակառուների համար պետք է լինի ԱՆՎՃԱՐ։ Ոչ թե «զեղչված», ոչ թե «կես գնով», այլ ամբողջությամբ անվճար։

* 8.5 միլիարդ դրամի բեռը պետք է վերցնի համայնքային ու պետական բյուջեն։ Դա վարչական ապարատի ու անհարկի ծախսերի օպտիմալացման ուղիղ արդյունք պետք է լինի, այլ ոչ թե թոշակառուի գրպանի հաշվին։

Ավագ սերնդին արժանապատիվ ծերություն ապահովելը ողորմություն չէ, դա մեր պարտքն է։ Ժամանակն է դադարեցնել տրանսպորտային բարեփոխումների անվան տակ սոցիալապես խոցելի խմբերի հաշվին բյուջե լցնելու արատավոր պրակտիկան։