Իսպանիայում անտառային հրդեհը ընդգրկել է ավելի քան 2 հազար հեկտար անտառ․ տարհանվել են հազարավոր բնակիչներ

Իսպանիայում հրշեջներին հաջողվել է կայունացնել անտառային հրդեհի աջ թևի մոտ 70%-ը, որը բռնկվել էր նախորդ օրը Լա-Բիսբալ դ’Էմպորդա շրջանում (Ժիրոնա նահանգ), սակայն ցերեկային ժամերին քամու ուժգնացումը կրկին տարածման վտանգ է ստեղծում Լես-Գավարես զանգվածում, որը շարունակում է փակ մնալ բարձր հրդեհավտանգության և մինչև 30 000 հեկտար այրման սպառնալիքի պատճառով, հայտնում է EFE-ն։

Բնապահպանական ծառայությունների գնահատմամբ, կրակն արդեն ոչնչացրել է մոտ 2 200 հեկտար, որոնցից ավելի քան 2 100-ը բաժին է ընկնում Լես-Գավարեսի բնական տարածքին․ տուժել են նաև գյուղատնտեսական և փոքր ուրբանիզացված հատվածները։ Հրդեհաշիջման աշխատանքներին գիշերվա և առավոտվա ընթացքում մասնակցել է մոտ 500 մարդ՝ հրշեջներ, բանակային ստորաբաժանումներ և կամավորներ։ Չնայած նրանց ջանքերին՝ կրակը հասել է բնակելի գոտիներ․ այրվել են արվարձաններից մեկում գտնվող բնակելի տունը և ֆերմերային շինություն, տուժածներ չկան։

Շաբաթ առավոտյան հրշեջներին հաջողվել է կայունացնել աջ թևի զգալի մասը, սակայն եղանակային պայմանները շարունակում են մնալ անբարենպաստ։ Սպասվող ծովային քամին կարող է նպաստել կրակի հետագա տարածմանը դեպի Ժիրոնա, որտեղ նախկինում վերահսկվող համարվող հատվածը կրկին մտահոգություն է առաջացնում։

Տարածաշրջանի իշխանությունները սահմանափակել են մուտքը բնական գոտիներ և մի քանի համայնքների բնակիչներին կոչ են արել մնալ տներում։ Ժամանակավոր սահմանափակման տակ է գտնվում մոտ 12 հազար մարդ՝ յոթ բնակավայրում։ Կատալոնիայի ղեկավարությունը նախազգուշացնում է, որ հրդեհի գոտում բնակչության տեղաշարժը մեծացնում է ռիսկերը, և ընդգծում է անվտանգության ծառայությունների ցուցումները խստորեն պահպանելու անհրաժեշտությունը։

Տարածաշրջանային իշխանությունների տվյալներով, հրդեհի պատճառը նախնական վարկածով պատահական բռնկումն է եղել, որն առաջացել է անտառային գոտում ճանապարհի մոտ կտրող գործիք օգտագործելու ժամանակ։ Ընթանում է հետաքննություն, մեկ մարդ ձերբակալվել է և կարող է պատասխանատվության ենթարկվել հրդեհային անվտանգության կանոնները խախտելու համար։

Տեղում շարունակում են աշխատել մոտ 600 մասնագետ, այդ թվում՝ հրշեջ հաշվարկներ, ռազմական ստորաբաժանումներ և ավիացիա, որը ներգրավված է հրդեհի օջախների տեղայնացման գործում։ Տարածաշրջանում պահպանվում է բարձր և ծայրահեղ հրդեհավտանգության մակարդակ՝ շարունակվող շոգի ալիքի ֆոնին։