Սամվել Կարապետյան. «Շատ շուտով «Ուժեղ Հայաստանը» մեծ պատասխանատվություն կստանձնի Հայաստանի թռիչքային զարգացումն ապահովելու համար»
Քաղաքականություն
«Շատ շուտով «Ուժեղ Հայաստան» կուսակցությունը մեծ պատասխանատվություն կստանձնի. այն կապահովի երկրի թռիչքային զարգացումը։ Այս մասին իր համախոհների հետ հանդիպման ժամանակ հայտարարել է տնային կալանքի տակ գտնվող «Ուժեղ Հայաստան» կուսակցության առաջնորդ Սամվել Կարապետյանը։
Նախքան երկրի զարգացման կուսակցական պլանը ներկայացնելը, Կարապետյանը կոչ արեց արձանագրել, թե ինչ են ժառանգում գործող անտաղանդ իշխանությունից։ Մասնավորապես՝ կորսված երկրորդ հայրենիքը, Ադրբեջանի կողմից օկուպացված Հայաստանի ինքնիշխան տարածքները, արյունալի պատերազմի հետևանքով մի քանի անգամ ընդլայնված «Եռաբլուր» զինվորական պանթեոնը, դաշնակիցների հետ շանտաժի լեզվով բանակցելու արդյունքում վերջիններիս վստահության կորուստը, Հայաստանի վերածումը աշխարհաքաղաքական բախումների կենտրոնի և Բաքվում հայ ռազմագերիների առկայությունը։
«Բացի այդ, ամբողջությամբ քայքայված է մեր տնտեսությունը. 21% աղքատություն, 15 միլիարդ դոլարի շեմին մոտեցող պետական պարտք, Հայաստանի տնտեսական ոլորտում հայկական սփյուռքի ներուժի ոչնչացում և իրավապահ մարմինների բռնությունների պատճառով ներքին ներդրողների անտարբերություն»,- հավելել է կուսակցության առաջնորդը»։
Այնուհետև Կարապետյանը ներկայացրեց, թե ինչ են մտադիր անել իշխանության գալու դեպքում՝ թռիչքային զարգացումն ապահովելու համար։ Նրա խոսքով՝ առաջին հերթին մտադիր են ձևավորել համախմբված ու ուժեղ հասարակություն, վերականգնել Հայ Առաքելական Եկեղեցու (ՀԱԵ) դերն ու տեղը, հայ մարդու կյանքում առաջնահերթ դարձնել արդարությունը, իրավահավասարությունը և մարդասիրությունը։ «Եվ ինչպես խոստացել էինք, մենք կունենանք երաշխավորված իրական խաղաղություն»,- հավելել է կուսակցության առաջնորդը։
Իր հերթին «Ուժեղ Հայաստան» կուսակցության վարչության անդամ Նարեկ Կարապետյանը քայլ առ քայլ ներկայացրեց, թե ինչպես է իրենց քաղաքական ուժը մտադիր ապահովել երկրի տնտեսության թռիչքային զարգացումը։ Մասնավորապես, նա ներկայացրեց այն ծրագրերը, որոնք մտադիր են իրականացնել մոտ ժամանակներս։ «Խորհրդարանական ընտրություններից հետո՝ երկու շաբաթվա ընթացքում, Հայաստանի Ազգային ժողովում կառաջարկվի օրենսդրական նախաձեռնություն, որով փոքր բիզնեսը կազատվի շրջանառության հարկից։ Դա 5 տարվա ընթացքում կապահովի 50,000 նոր աշխատատեղ։ Ընդհանուր առմամբ, մենք մտադիր ենք ստեղծել 300,000 նոր աշխատատեղ, այն դեպքում, երբ Հայաստանի վարչապետ Նիկոլ Փաշինյանը պատրաստ է մեր երկրի դռները բացել 300,000 ադրբեջանցիների առաջ»,- նշել է կուսակցության վարչության անդամը։
Միջին և խոշոր բիզնեսի համար, ինչպես շարունակել է Նարեկ Կարապետյանը, մտադիր են ապահովել այնպիսի տնտեսական պայմաններ, որոնցով Հայաստանը կդառնա ամենամրցունակը տարածաշրջանի մյուս երկրների համեմատությամբ։ «Օրինակ՝ միջին բիզնեսի համար այդ նպատակով կստեղծվեն Հայաստանում լոկալիզացման և հայկական արտադրանքի զարգացման ծրագրեր, որպեսզի մեր երկիրը զբաղվի ոչ թե ներմուծմամբ, այլ արտադրի տեղում։ Հայաստանի վերաինդուստրիալացման համար մեզ անհրաժեշտ են նաև խոշոր օտարերկրյա ներդրումներ, որոնք մենք մտադիր ենք ապահովել շատ կարճ ժամանակում»,- հայտարարել է վարչության անդամը։
Եզրափակելով՝ «Ուժեղ Հայաստան» կուսակցության առաջնորդը հայտնել է, որ առաջիկա հանդիպումների ընթացքում մտադիր են ներկայացնել Հայաստանի տնտեսության զարգացման նոր ծրագրեր, որոնք, Կարապետյանի կարծիքով, հեղափոխական կլինեն երկրի կյանքում։
Նշենք, որ Հայաստանում խորհրդարանական ընտրությունները նախատեսված են 2026 թվականի հունիսի 7-ին։
