Բանակը պարզապես զենք ու համազգեստ չէ, բանակը պետության ողնաշարն է. Նաիրի Սարգսյան
Քաղաքականություն
Շնորհավոր Հայոց բանակի օրը
Մենք ապրում ենք ժամանակներում, երբ ցավով տեսնում ենք, թե ինչպես է ՀՀ ղեկավարությունը փորձում բառի բուն իմաստով կազմալուծել հայոց բանակը, արժեզրկել հայ զինվորին, կասկածի տակ դնել բանակ ունենալու գաղափարը։
Բայց մեր բանակը, մեր զինվորը, մեր կամավորն իր պատմությամբ բազմիցս ապացուցել է, որ անկախ օրվա իշխանության մտադրություններից՝ երկրի համար վճռորոշ պահերին կանգնած է իր դիրքում, իր հայրենիքի կողքին:
Այս մասին ասվում է «Հայաստանը ես եմ»նախաձեռնության ղեկավար Նաիրի Սարգսյանի ուղերձի մեջ։
«Այս օրերին առավել քան կարևոր է գիտակցելը, որ բանակը պարզապես զենք ու համազգեստ չէ։ Բանակը պետության ողնաշարն է։ Բանակը մեր անվտանգությունն է, արժանապատվությունն է, խաղաղ ապրելու իրավունքն է, մեր ինքնապաշտպանությունն է։
Աշխարհում այսօր իրավունքի ուժը փոխարինվել է ուժի իրավունքով։
Իսկ ուժի իրավունքի կարևոր բաղկացուցիչներից մեկն էլ բանակն է։
Բայց միայն բանակին ապավինելը ևս բավարար չէ․ պետք է նաև ազգային միասնականություն, արժեհամակարգ, պետական մտածողություն։
Այսօր մենք ապրում ենք մի աշխարհում, որտեղ նույնիսկ ժողովրդավար համարվող երկրներն են ներխուժում այլ պետություններ և ուժի իրավունքով մեկ օրում «իրենցով անում» այդ երկրները։
Հետևաբար՝ ուժեղ բանակը պետության գոյատևման ամենակարևոր նախադրյալներից մեկն է։
Առանց բանակի չկա անկախություն։
Խոնարհվում եմ բոլոր այն զինվորների ու կամավորների առջև, ովքեր պահել ու պահում են մեր հողը, մեր տունը, մեր ՀԱՅՐԵՆԻՔԸ, մեր երեխաների ապագան։
Փա՛ռք Հայոց բանակին։
Փա՛ռք հայ զինվորին։
Փա՛ռք հայրենիքը պահողին։ »,- նշել է Նաիրի Սարգսյանը։
