Դատարանի հրապարակած վճռով անվավեր է ճանաչվել ԵՊՀ ռեկտորի՝ աշխատակիցներից մեկին աշխատանքից ազատելու հրամանը. Խաչիկ Աբաջյան
Հասարակություն
«Երիտասարդները հանուն զարգացման» հիմնադրամի գործադիր տնօրեն Խաչիկ Աբաջյանը ֆեյսբուքյան իր էջում գրել է.
Սիրելինե՛ր, հավանաբար կհիշեք 2025 թ. հուլիսյան դեպքերը, երբ ԵՊՀ ռեկտորի խայտառակ և անգրագետ հրամանով ես և ԵՊՀ ուսանողների հետ տարվող աշխատանքների կենտրոնի մյուս բոլոր աշխատակիցները ազատվել էինք աշխատանքից:
Մենք անհապաղ սկսել էինք իրավական գործընթաց՝ դատական կարգով բողոքարկելով մեզ աշխատանքից ազատելու մասին ԵՊՀ ռեկտորի հրամանները:
Օրերս դատարանի կողմից հրապարակված վճռով անվավեր է ճանաչվել ԵՊՀ ռեկտորի՝ կենտրոնի աշխատակիցներից մեկին աշխատանքից ազատելու մասին հրամանը (յուրաքանչյուր աշխատակցի գործ քննվում է առանձին, մյուս վճիռները հրապարակվելու են դեկտեմբեր-փետրվար ամիսներին):
Արդյունքում ԵՊՀ-ն ստիպված է լինելու կրել զգալի ֆինանսական պարտավորվածություն՝ արկածախնդիրների քմահաճույքով և քաղաքական պատվերով պայմանավորված: Բայց կարծում եմ ԵՊՀ ռեկտորին դա այնքան էլ չի անհանգստացնի, որովհետև վերջին մի քանի տարիներին համալսարանը մի քանի տասնյակ միլիոն դրամների փոխհատուցումներ է տրամադրել ԵՊՀ-ից ապօրինի կերպով ազատված աշխատակիցներին: Շարքը վստահաբար շարունակվելու է:
Ի դեպ դատական նիստերի ընթացքում մի աննախադեպ բան պարզվեց (նույնիսկ դատավորներն էին զարմանում, որ իրենց պրակտիկայում նման դեպքի չեն առնչվել).
Մեզ 2025 թ. հուլիսի 9-ին ծանուցել են աշխատակից ազատման վերաբերյալ՝ որպես հիմք վկայակոչելով նաև մեր հաստիքների լուծարված լինելու հանգամանքը: Սակայն դատական նիստերի ընթացքում պարզ դարձավ, որ մեր «խելոքները» մեր հաստիքները իրականում լուծարել են 2025 թ. սեպտեմբերի 3-ին (մեզ ծանուցելուց շուրջ երկու ամիս հետո)՝ ԵՊՀ «չքաղաքականացված» հոգաբարձուների խորհրդի որոշմամբ:
Իսկ ԵՊՀ ներկայացուցիչը (ով շատ անհարմար իրավիճակներում էր հայտնվում դատական նիստերի ընթացքում) պնդում էր, որ իրենք հուլիսին կանխատեսել են, որ սեպտեմբերին հոգաբարձուների խորհուրդը կարող է լուծարի մեր հաստիքները:
Արդարությունը վերականգնվելու է, իսկ ապօրինություններ թույլ տվողների հետևից գալու են:
