Հայ շախմատիստները մեդալներ են բերել Աբու Դաբիի մրցաշարից

Հայ շախմատիստները մրցանակների են արժանացել «31st Abu Dhabi International Chess Festival» շախմատի միջազգային մրցաշարում։ Նրանք 4 ոսկե, 1 արծաթե և 2 բրոնզե մեդալ կբերեն հայրենիք։ Տեղեկությունը հայտնում է Հայաստանի շախմատի ֆեդերացիան։

Գլխավոր՝ Ա խմբում գրոսմայստեր Վահե Բաղդասարյանը դարձել է միանձնյա հաղթող՝ 9 հնարավորից վաստակելով 8 միավոր: Բ խմբում Տիգրան Պետրոսյանը զբաղեցրել է 2-րդ հորիզոնականը, իսկ մինչև 16 տարեկանների խմբում՝ 3-րդ հորիզոնականը։ Նույն խմբում Արթուր Ղարագյոզյանը զբաղեցրել է 7-րդ հորիզոնականը, Հայկ Խաչիկյանը՝ 8-րդը, իսկ Նարե Իսախանյանը ճանաչվել է լավագույն շախմատիստուհի:

Կանանց կայծակնային շախմատի մրցաշարում գրոսմայստեր Մարիա Գևորգյանը զբաղեցրել է 3-րդ հորիզոնականը:
Ընտանիքների մրցաշարում (ծնող + երեխա) հաղթող է ճանաչվել գրոսմայստեր Վլադիմիր Հակոբյանի և ՖԻԴԵ-ի վարպետ Էդուարդ Հակոբյանի թիմը, իսկ Արտակ Մանուկյանի և Սարգիս Մանուկյանի թիմն էլ արծաթե մեդալի է արժանացել։

Մինչև 17 տարեկան պատանիների կայծակնային շախմատի մրցաշարում միջազգային վարպետ Բենիկ Ագասարովը զբաղեցրել է 1-ին հորիզոնականը:

13 տարեկան աղջիկների կայծակնային շախմատի մրցաշարում 1-ին հորիզոնականին է արժանացել նաև Գաբրիելա Հարությունյանը։

Պատանի շախմատիստները հաջողություններ են գրանցել ու մրցանակային տեղեր զբաղեցել նաև մյուս տարիքային խմբերում։