Փաշինյանն աշխարհաքաղաքական «ռուսական ռուլետկա» է խաղում. «Փաստ»

«Փաստ» օրաթերթը գրում է.

Եթե Հայաստանը շարունակի խոչընդոտել «Զանգեզուրի միջանցքի» բացման հետ կապված գործընթացը, նրա՝ երբևէ տարանցիկ երկիր դառնալու հնարավորությունները կզրոյանան: Ահա, այսպիսի հայտարարություն է նաև օրերս արել Ադրբեջանի նախագահ Իլհամ Ալիևը։ Ըստ էության, Ադրբեջանի պահանջներն ու սպառնալիքները բազմաշերտ են:

Թեմայի հետ կապված անդրադարձում մասնավորաբար «Հանրապետության հրապարակ» տելեգրամյան ալիքը գրում է, որ Փաշինյան-Ալիև տանդեմն ամեն ինչ արեց, որպեսզի Արցախը հանձնվի, հայաթափվի, ադրբեջանական զորքերն էթնիկ զտումներ իրականացնեն Արցախում ու այսօր Ստեփանակերտում ծածանվի ադրբեջանական դրոշը. «Նույն ճակատագիրը սպասվում է նաև Սյունիքին, եթե Փաշինյանն ու նրա թրքամետ ու փողասեր խմբակը մնա իշխանության և վերարտադրվի նաև 2026 թվականին»:

Ալիևի պահանջների ցուցակը ՀՀ-ից ունի սկիզբ, սակայն չունի վերջ՝ Սահմանադրության փոփոխություն, Մինսկի խմբի լուծարում, այսպես կոչված՝ «Զանգեզուրի միջանցք», ադրբեջանցիների «վերադարձ», հայոց բանակի կրճատում, ՀՀ-ի դեմիլիտարիզացիա, անկլավների տրամադրում և այլն։ «Փաշինյանական կլանն ապացուցել է, որ, հանուն իշխանության պահպանման և փողի, նրանք պատրաստ են սպասարկել Արևմուտքի՝ հակառուսական և Ադրբեջանի՝ թուրք-ադրբեջանական օրակարգերը»,-գրում է ալիքը։

Արցախցիները պարտադրաբար լքեցին Արցախն, իսկ այսօր Հայաստանից են արտագաղթում: Ըստ հեղինակների, նույն ճակատագիրը սպասվում է ՀՀ քաղաքացիներին, եթե նրանք չպաշտպանեն Հայ առաքելական եկեղեցին և հայոց պետականությունը թուրք-ադրբեջանական տանդեմի դաշնակից քպականներից. «ՔՊ-ի վերարտադրությունը հայոց պետականության վախճանն է խորհրդանշելու։ Փաշինյանն ու թիմը պետք է հեռացվեն, հակառակ պարագայում ադրբեջանական դրոշներ են ծածանվելու արդեն Սյունիքում և Գեղարքունիքում»։

Ինչպես հայտնի է, բանտում գտնվող գործարար Սամվել Կարապետյանն օրերս հայտարարել է. «Հայաստանը հանելո՛ւ ենք աշխարհաքաղաքական զոհի վիճակից: Վերականգնելո՛ւ ենք շահերի և հետաքրքրությունների բալանսը տարածաշրջանում: Ու այդ ժամանակ տարանցիկ ճանապարհները Հայաստանի սուվերեն տարածք են մնալու, տարեկան հարյուր միլիոնավոր դոլարներով լցնելու են Հայաստանի, այլ ոչ թե այլ, թեկուզ և բարեկամ որևէ երկրի բյուջեն»։ Անդրադառնալով այս թեմային՝ ալիքի հեղինակները նշում են, որ Փաշինյանը Հայաստանը վերածել է Արևմուտք-ՌԴ proxy war-ի տարածքի՝ դրանից բխող բոլոր աղետալի հետևանքներով հայոց պետականության, Արցախի ու հայկական ազգային ու պետական շահերի համար։ «Փաշինյանն Արևմուտքում ռուսաֆոբ է խաղում, իսկ Մոսկվայում՝ ռուսամետ, սակայն ո՛չ Արևմուտքը, ո՛չ ՌԴ-ն Փաշինյանին ու նրա թրքամետ խմբակին չեն վստահում, ինչն էլ հանգեցնում է Հարավային Կովկասում թուրք-ադրբեջանական տանդեմի դիրքերի ամրապնդմանը։ Փաշինյանն աշխարհաքաղաքական «ռուսական ռուլետկա» է խաղում, ինչն էլ հանգեցրեց Արցախի կորստին, ու այսօր Ալիևն արդեն պահանջում է Սյունիքն ու ադրբեջանցիների «վերադարձ» Հայաստան ու ՀՀ Սահմանադրության փոփոխություն»,-գրում է ալիքն ու հավելում, որ Հայաստանը չպետք է վերածվի երկրորդ Ուկրաինայի՝ հակառուսական պլացդարմի, քանի որ դա հանգեցնելու է ծանր հետևանքների հայկական պետականության համար. Ուկրաինան վերածվեց ճակատի ընդդեմ ՌԴ-ի, ու դա շատ թանկ նստեց այդ երկրի վրա։

«Փաշինյանն ու թիմը, հանուն իշխանության և 2026 թվականին վերարտադրվելու, պատրաստ են «Զանգեզուրի միջանցք» տրամադրել թուրք-արևմտյան տանդեմին, ինչպես նաև զրոյացնել ՀՀ-ում ռուսական ազդեցությունը, միայն թե Արևմուտքը Փաշինյանին և թիմին թույլ տա մնալ իշխանության 2026 թվականին»,-գրում են հեղինակներն ու շեշտում, որ «Զանգեզուրի միջանցքը» հայոց պետականության ոչնչացման ճանապարհային քարտեզն է և լոգիստիկան։ Ըստ ալիքի, ազգային ու պետականամետ ուժերը պետք է ձևավորեն միասնական ճակատ՝ Փաշինյանին հեռացնելու համար. «Ազգային ուժերը պետք է պաշտպանեն Հայ առաքելական եկեղեցին, Արցախի հարցը կրկին բերեն օրակարգ, հզորացնեն հայոց բանակն ու տնտեսությունը, ինչպես նաև հայ-ռուսական կապերը նորից բարձրացնեն ռազմավարական, դաշնակցային մակարդակի՝ թուրք-ադրբեջանական տանդեմին զսպելու համար։ ՀՀ-ում իշխանափոխությունը հայոց պետականության փրկության միակ տարբերակն է. Փաշինյանն ու թիմն իրենց կամքով երբեք չեն հեռանալու»։

Մանրամասները՝ «Փաստ» օրաթերթի այսօրվա համարում