Կիևին ԱՄՆ օգնության դադարեցումը ԵՄ-ի համար ազդանշան է աջակցությունն ավելացնելու համար. Ֆոն դեր Լայեն
Քաղաքականություն
Միացյալ Նահանգների կողմից Ուկրաինային ռազմական օգնության դադարեցումը Եվրամիությունն ընկալել է սեփական ջանքերը ակտիվացնելու կոչ։ Ըստ ТАСС գործշակալության՝ հայտարարել է Եվրահանձնաժողովի նախագահ Ուրսուլա ֆոն դեր Լայենը։
«Միացյալ Նահանգների որոշումը հստակ ազդանշան է ԵՄ երկրներին եվրոպական մատակարարումները մեծացնելու անհրաժեշտության մասին», -հայտարարել է ֆոն դեր Լայենը Դանիայի Օրհուս քաղաքում անցկացված մամուլի ասուլիսում, որտեղ նա ներկա էր ԵՄ խորհրդում երկրի նախագահության մեկնարկի կապակցությամբ։
Դանիայի վարչապետ Մետտե Ֆրեդերիկսենը ԱՄՆ-ի մատակարարումների դադարեցումն անվանել է «լուրջ հետընթաց Կիևի, Եվրոպայի և ՆԱՏՕ-ի համար»։ Նա միաժամանակ եվրոպական պետություններին կոչ արեց ներդրումներ կատարել Ուկրաինայի տարածքում զենքի արտադրության ընդլայնման գործում։
Ավելի վաղ՝ հուլիսի 2-ին, ՆԱՏՕ-ում ԱՄՆ մշտական ներկայացուցիչ Մեթյու Ուիթաքերը հաստատել էր, որ Վաշինգտոնը կասեցրել է Ուկրաինային մի շարք զենիթային հրթիռների և այլ բարձր ճշգրտության զինամթերքի մատակարարումը։ Մասնավորապես, խոսքը Patriot հակաօդային պաշտպանության համակարգերի համար նախատեսված տասնյակ հրթիռների մասին է։ Այդ քայլի պատճառը զենքի պաշարները սեփական կարիքների համար պահպանելու ցանկությունն էր։
