Իրանի ԱԳ նախարարն արձագանքել է Թրամփի՝ Պարսից ծոցն «Արաբական ծոց» անվանելու մտադրությանը
Միջազգային
Պարսից ծոցի պատմական անվանումը փոխելու քաղաքական դրդապատճառները վկայում են Իրանի դեմ թշնամական մտադրությունների մասին. այս մասին ասել է Իրանի արտաքին գործերի նախարար Սեյյեդ Աբբաս Արաղչին՝ մեկնաբանելով լրատվամիջոցներում տարածված տեղեկությունն այն մասին, որ ԱՄՆ նախագահ Դոնալդ Թրամփը Սաուդյան Արաբիա կատարելիք այցի շրջանակում պատրաստվում է Պարսից ծոցն անվանել Արաբական ծոց: Այս մասին գրում է Tasnim գործակալությունը:
«Պարսից ծոց անվանումը, ինչպես շատ աշխարհագրական անվանումներ, խոր արմատներ ունի մարդկության պատմության մեջ։ Իրանը երբեք դեմ չի եղել այնպիսի անունների օգտագործմանը, ինչպիսիք են Օմանի ծովը, Հնդկական օվկիանոսը, Արաբական ծովը կամ Կարմիր ծովը: Այս անունների օգտագործումը չի ենթադրում սեփականություն որևէ կոնկրետ ազգի կողմից, այլ ավելի շուտ ցույց է տալիս ընդհանուր հարգանք մարդկության հավաքական ժառանգության նկատմամբ:
Ի հակադրություն, Պարսից ծոցի պատմական անվանումը փոխելու քաղաքական դրդապատճառները վկայում են Իրանի և նրա ժողովրդի դեմ թշնամական մտադրության մասին և խստորեն դատապարտվում են: Նման կողմնակալ գործողությունները վիրավորանք են բոլոր իրանցիների համար՝ անկախ նրանց ծագումից կամ բնակության վայրից։ Հուսով եմ, որ Պարսից ծոցի անվան մասին զավեշտալի խոսակցությունները ոչ այլ ինչ են, քան ստի արշավ՝ զայրացնելու և հրահրելու իրանցիներին ամբողջ աշխարհում»,- նշել է Արաղչին:
