Մելիքբեկյանի օրերը հաշվված են, բայց նա մեծ ախորժակ ունի

Վրաստանում կրած խայտառակ ֆուտբոլային պարտությունից հետո Հայաստանի ֆուտբոլի ֆեդերացիայի նախագահ Արմեն Մելիքբեկյանի դիրքերը գնալով ավելի թուլանում են: 1։ 6 հաշվով պարտությունը, որին ականատեսը եղավ հենց վարչապետի պաշտոնը զբաղեցնող Նիկոլ Փաշինյանը, կարծես թե դրել է Մելիքբեկյանի և նրա տեղակալ Արմեն Նիկողոսյանի հրաժարականի սկիզբը։ Ընդ որում, ՔՊ մեր աղբյուրների փոխանցմամբ, Փաշինյանը չափազանց զայրացած էր և իր աչքով ու իր նվաստացման գնով է տեսել, թե ինչ է կատարվում Հայաստանի ֆուտբոլի ֆեդերացիայում և հանձնարարել է կտրուկ միջոցներ ձեռնարկել, նաև ինչ-որ մեկին գտնել, որի վրա կկարողանան բարդել ֆեդերացիայի նախագահի աշխատանքը։

Ինքը` Մելիքբեկյանն էլ, կարծես թե, դեմ չէ հեռանալու ֆուտբոլի ֆեդերացիայի նախագահի պաշտոնից, բայց ունի մի գերնպատակ, առնվազն ֆեդերացիայի նախագահի պաշտոնը պահպանել մինչև ապրիլի 3–ը, երբ Բելգրադում կայանալու է ՈւԵՖԱ-ի գործկոմի ընտրությունը։ ՈւԵՖԱ-ն ներկայացրել է գործկոմի անդամության 11 թեկնածուներին, որոնցից ընտրվելու է 7–ը։ Թեկնածուներից մեկն էլ Արմեն Մելիբեկյանն է, և ընտրվելու դեպքում նա կկարողանա տեղափոխվել Շվեյցարիա և չափազանց բարձր, տարեկան գրեթե 200 հազար եվրո աշխատավարձով, մի քանի տարի անվրդով կյանք վարել` բոլորովին չմտահոգվելով իր ետևից թողած ավերակների մասին։

Ի դեպ, Մելիքբեկյանից հետո ֆեդերացիայում շատերի գլուխներն են թռչելու, և այդ շատերը հրաշալի հասկանում են, որ եթե Մելիքբեկյանը մնա մինչև ապրիլի 3–ը և նրան հաջողվի դառնալ ՈւԵԱՖ-ի գործկոմի անդամ, ապա նա իրեն կապահովի տարատեսակ խնդիրներից, իսկ Հայաստանում մնացածները կզրկվեն ապրուստի միջոցներից, ինչպես նաև կհայտնվեն իշխանության թիրախում, ուստի և փորձելու են իրենց հետ քարշ տալ նաև Մելիքբեկյանին։

Այս օրերին ֆուտբոլի ֆեդերացիայում իսկական սուգ է տիրում, Փաշինյանն էլ թերևս չների Մելիքբեկյանին և պահանջի ժամկետից շուտ վայր դնել ֆեդերացիայի նախագահի պաշտոնը, իսկ այդ դեպքում՝ խայտառակ պաշտոնանկությունից հետո դժվար թե Արմեն Մելիքբեկյանի պես դիլետանտ և հակաֆուտբոլային ֆունկցիոներին ընտրեն ՈւԵՖԱ-ի գործկոմի կազմում։

Աննա Թովմասյան