Փաշինյանը վատ վիճակում է հայտնվել ԱՄՆ վարչակազմի մոտ
Քաղաքականություն
Հայաստանի գործող իշխանությունները բավականին վատ վիճակում են ամերիկացիների հետ հարաբերություններում, ավելի ճիշտ, որևէ հարաբերություն իրականում գոյություն չունի, Փաշինյանը հայտնվել է Սպիտակ տան սև ցուցակում, քանի որ նախընտրական արշավի ժամանակ աջակցել են դեմոկրատներին։
Թրամփի վարչակազմը, ըստ էության, նման քայլերը չի ներում, և Զելենսկու հետ հանդիպմանը փոխնախագահ Վենսի հիշատակումը, թե Զելենսկին գնացել է Փենսիլվանիա, աջակցել դեմոկրատների թեկնածուին այդ տատանվող նահանգում, ազդակ էր նաև Փաշինյանին։ ԱՄՆ-ից վերջինիս պարզ հասկացրել են, որ դեսպանին փոխելու կարիք կա, Մակունցն էլ մեկնել էր Փենսիլվանիա։
ԱՄՆ-ի հետ հարաբերություններում Փաշինյանի ամենամեծ խնդիրն այն է, որ ոչ միայն ինքը լավ հարաբերություններ չունի նոր վարչակազմի, անգամ հայամետ գործիչների հետ, այլ որ Ռուբիոյի, Վենսի, մյուսների հետ կապեր են հաստատել ՀՅԴ-ից։ Վերջերս ՀՅԴ Ընդհանուր ժողովում նույնիսկ այդպիսի ակնարկներ արվեցին։
Նոր վարչակազմի հետ լավ կապեր է հաստատել նաև Հայ առաքելական եկեղեցին, ինչը ևս վտանգ է Փաշինյանի իշխանության համար։ Ուստի զարմանալի չէ, որ Փաշինյանը սկսել է ռևերանսներ անել Ռուսաստանին, նույնիսկ պարտադրել, որ այսօր փորձեն սիրաշահել ռուսական իշխանություններին։
Մյուս կողմից, Փաշինյանի իշխանությունը փորձում է սիրաշահել Դաշնակցությանը, միևնույն ժամանակ պառակտում մտցնել Հայաստանի և Սփյուռքի դաշնակցականների միջև, տպավորություն ստեղծել, թե արտերկրի դաշնակցականներն ավելի լավն են, նրանց հետ հնարավոր է աշխատել։
Էլեն Սանթրոսյան
