Հայաստանի կարծիքը ոչ ոք չի հարցնում

Հայկական որոշ ԶԼՄ-ներ երեկ տեղեկություն էին տարածել, թե առաջիկայում Թուրքիա իրանական պատվիրակություն է այցելելու՝ այսպես կոչված, «Զանգեզուրի միջանցքի» թեման քննարկելու համար։ Սկզբնաղբյուրն ադրբեջանական քարոզչամեքենան էր, որը, պարզվեց, իր սովորույթի համաձայն, կեղծիք է տարածել։ Իրականում իրանական պատվիրակությունն այցելելու է երկու երկրների միջև առկա լարվածությունը քննարկելու համար, ինչը պայմանավորված է իրանական բեռնատարների կողմից Թուրքիայում հավելյալ մաքսատուրք վճարելու և թուրքական բեռնատարներին իրանական բենզին չվաճառելու հետ։

Իրանի ԱԳՆ մամուլի խոսնակ Իսմայիլ Բաղայիին ճեպազրույցի ժամանակ լրագրողներից մեկը հարց էր տվել այս խնդրի և այսպես կոչված «Զանգեզուրի միջանցքի» հետ դրա հնարավոր կապի մասին։ Բաղային նշել էր, որ բեռնատարների հետ կապված հարցը ոչ թե քաղաքական է, այլ, ավելի շուտ, տեխնիկական: «Հնարավոր է, որ մոտ ժամանակներս մեր պատվիրակությունը համապատասխան կառույցների ներկայացուցիչների մասնակցությամբ այցելի Թուրքիա՝ այդ հարցը մանրամասն քննարկելու համար: Հուսով ենք, որ հարցը կլուծվի առաջիկայում»,- ընդգծել էր նա։ Խոսելով «Զանգեզուրի միջանցքի» մասին, Բաղային ասել էր. «Իրանն անփոփոխ դիրքորոշում ունի։ Իրանը ողջունում է տրանսպորտային ոլորտում համագործակցության ընդլայնումը, սակայն մենք ընդգծում ենք, որ երկրների ինքնիշխան իրավունքները պետք է հարգվեն»։

Թուրքիայի նախագահ Ռեջեփ Թայիփ Էրդողանը դեռ երկու տարի առաջ է նշել, որ «Զանգեզուրի միջանցքի» հարցով խնդիրը Հայաստանի հետ չէ, այլ՝ Իրանի։ «Այլ կերպ ասած՝ երկու մուսուլմանական երկրների խնդիր։ Այն փաստը, որ Իրանն այդ հարցով այդպիսի դիրքորոշում ունի, վրդովեցնում է և՛ Ադրբեջանին, և՛ մեզ»,- ասել էր Էրդողանը։

Փաստացի, այս անգամ էլ ստացվում է, որ տարածաշրջանի և ոչ մի երկիր չի հարցնելու ՀՀ կարծիքն անգամ իրեն վերաբերող հարցերում։ Իրանը կբանակցի Թուրքիայի և Ադրբեջանի, Ռուսաստանի հետ, կգան կամ չեն գա որևէ պայմանավորվածության, իսկ Հայաստանը, Նիկոլ Փաշինյանի ջանքերով, վաղուց սուբյեկտից վերածվել է բանակցությունների օբյեկտի։

Աննա Վարդանյան