Դեպի երազանք. «Երաժշտություն հանուն ապագայի» հիմնադրամի բացառիկ առաջարկը՝ երաժիշտներին և դասավանդողներին
Մշակույթ
Մեծ բեմերը, վարպետության դասերը, հանդիպումները հանրահռչակ երաժիշտների հետ յուրաքանչյուր պատանու երազանքն է, ով զբաղվում է երաժշտությամբ: Հասկանալի է՝ սա փոխկապակցված է միջազգային ասպարեզում կապեր ունենալու, նաև ֆինանսական հնարավորությունների հետ: Երբեմն սա անհասանելի երազանք է թվում, բայց «Երաժշտություն հանուն ապագայի» հիմնադրամը կարող է ձեր ամենահամարձակ երազանքի իրականացման համար հիմքեր ստեղծել:
Մերձավոր Արևելքի դասական երաժշտության ակադեմիան Հայաստանի «Երաժշտություն հանուն ապագայի» հիմնադրամի հետ միասին առաջարկում են ճանապարհորդության բացառիկ հնարավորություն դեպի Դուբայ՝ Մերձավոր Արևելքի դասական երաժշտության ակադեմիային (Middle East Classical Music Academy-MECMA) մասնակցելու նպատակով, որն անցկացվելու է 2025 թ․-ի ապրիլի 6-ից 21-ը: Ծրագրում ընդգրկվելու հնարավորություն ունեն Հայաստանի երաժշտական և արվեստի դպրոցի/քոլեջի/կոնսերվատորիայի սան հանդիսացող պատանի երաժիշտները, որոնք դիմելու օրվա դրությամբ 12-18 տարեկան են (18-ը ներառյալ) և սովորում են հետևյալ ուղղություններով՝ լարային գործիքներ (ջութակ, ալտ, թավջութակ), փողային գործիքներ (ֆլեյտա, հոբոյ, կլարնետ, ֆագոտ, գալարափող, շեփոր, տրոմբոն, սաքսոֆոն) և դաշնամուր: Ծրագրին կարող են մասնակցել նաև երաժշտական կրթական հաստատությունների ուսուցիչներն ու դասախոսները՝ որպես պասիվ մասնակիցներ բոլոր վարպետության դասերին և դասախոսություններին:
«Երաժշտություն հանուն ապագայի» հիմնադրամն արդեն երրորդ անգամ է նախաձեռնում «Կրթական ուղևորություն» դեպի Արաբական Միացյալ Էմիրություններ: Սա վկայում է Մերձավոր Արևելքի դասական երաժշտության ակադեմիայի հետ կայացած փոխգործակցության մասին: Բոլորովին զարմանալի չէ, որ Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի նախաձեռնությամբ ստեղծված հիմնադրամն է աջակցում պատանի երաժիշտներին իրենց ուղին հարթելու ոչ այնքան հեշտ գործում: Հիմնադրամի գլխավոր նպատակն է եղել և մնում բացահայտել Հայաստանի տաղանդավոր երաժիշտներին և աջակցել նրանց հասնելու իրենց երազանքներին: Անցնող տարիների ընթացքում հիմնադրամը նախաձեռնել և հաջողությամբ իրականացրել է կրթական բազմաթիվ ծրագրեր վեց ուղղություններով ՝ վարպետության դասեր, բեմական փորձ, համերգների այցելություն, թանգարանային այցեր, օտար լեզվի դասեր, կրթաթոշակ:
Դեպի արտերկիր կրթական ուղևորություններից առանձնացնենք մի քանիսը. 2021, 2024 թթ.-ին Դուբայ՝ Մերձավոր Արևելքի դասական երաժշտության ակադեմիա (Middle East Classical Music Academy) և InClassica միջազգային փառատոն, 2022, 2024 թթ.-ին Մոսկվա՝ Վլադիմիր Սպիվակովի անվան միջազգային բարեգործական հիմնադրամի «Մոսկվան դիմավորում է ընկերներին» միջազգային փառատոն, 2022 թ.-ին Շվեյցարիա՝ Ինտերլակեն միջազգային փառատոնին մասնակցություն, 2024 թ.-ին Տալլին և Պյարնու՝ Յարվի Ակադեմիա (Järvi Academy) և Պյարնուի երաժշտական փառատոն (Pärnu Music Festival), 2024 թ.-ին Շվեյցարիա՝ վարպետության դասեր ջութակահար Զախար Բրոնի հետ, 2024 թ.-ին Բեռլին՝ վարպետության դասեր հոբոյահար Ալբրեխտ Մայերի հետ:
Երաժիշտները և դասավանդողները պետք է, վստահաբար, օգտագործեն «Երաժշտություն հանուն ապագայի» հիմնադրամի ընձեռած դեպի Դուբայ կրթական ուղևորության մեկնելու հնարավորությունը ոչ միայն սեփական գիտելիքների ու փորձառության պաշարն ավելացնելու, այլ նաև դրանք հետագայում մեր կրթական համակարգում ներդնելու համար:
