Խոշոր հրդեհ՝ «Մուսալեռ» ռեստորանային համալիրում․ կրակն ու ծուխը տեսանելի են եղել մոտ 1 կմ-ից

Նոյեմբերի 10-ին, խոշոր հրդեհ է տեղի ունեցել Արմավիրի մարզում։ Ժամը 22։10-ի սահմաններում ՀՀ Ներքին գործերի նախարարության  փրկարար ծառայության 9-11 ճգնաժամային կառավարման ազգային կենտրոն  ահազանգ է ստացվել, որ Մուսալեռ գյուղում գործող «Մուսալեռ» ռեստորանային համալիրում հրդեհ է բռնկվել։

Ինչպես դեպքի վայրից հայտնում է ֆոտոլրագրող Գագիկ Շամշյանը, հրդեհի վայր են ժամանել Վաղարշապատի, Արմավիրի, Երևանի հրշեջ-փրկարարական ջոկատներից մի քանի մարտական հաշվարկներ։ Տեղում հայտարարվել է հրդեհի բարդության «Թիվ 2 կանչ»։ Ժամանել են նաև հատուկ փրկարարական աշխատանքների իրականացման կենտրոնի հերթապահ և ճգնաժամային կառավարման ազգային կենտրոնի օպերատիվ խմբերը։

Մինչ հրշեջների ժամանումը՝ կրակի տարածումը փորձել են կանխել ռեստորանային համալիրի աշխատակիցները, ապա ժամանած հրշեջները մարել են կրակը, իսկ այս պահին հրշեջները իրականացնում են հետախուզական աշխատանքներ՝ կրակի թաքնված օջախներ հայտնաբերելու համար։

Ժամանել են նաև շտապօգնության բժիշկների հերթապահ 2 խումբ, ովքեր հերթապահություն են իրականացնում։ 

Ոստիկանությունը պարզում է՝ արդյոք հրդեհի հետևանքով տուժած քաղաքացի կամ քաղաքացիներ կան, թե ոչ։

Դեպքի փաստով ոստիկանության Վաղարշապատի բաժնում փաստաթղթեր են ձևակերպվում,  որոնք, հնարավոր է, փոխանցվեն ՀՀ Քննչական կոմիտեի Արմավիրի մարզային քննչական վարչության Վաղարշապատի քննչական բաժին։

ֆոտոլրագրողը հայտնում է, որ մինչ հրշեջների ժամանումը կրակն ու ծուխը տեսանելի էին  մոտ 1 կմ-ից։