Լոս Անջելեսի նավահանգստի մի մասը մարտկոցների բռնկման պատճառով կփակվի. Bloomberg
Միջազգային
Կալիֆոռնիա նահանգի Լոս Անջելես քաղաքի նավահանգիստը մասամբ կփակվի ուրբաթ օրը լիթիումային մարտկոցներ պարունակող տարայի հրդեհի պատճառով։ Այս մասին հայտնում է Bloomberg-ը՝ հրշեջ ծառայությանը հղումով։
«Մարտկոցները վնասված են, այրվում են և գազեր են արտանետում (հաղորդվում է մեկ մարտկոցի պայթյունի մասին)»,- ասվում է հրշեջ ծառայության հաղորդագրության մեջ։ Միջազգային առափնյա և պահեստների միության ներկայացուցիչն ասել է, որ «այս հրդեհը հնարավոր չէ մարել և կարող է շարունակվել մինչև 48 ժամ»:
Գործակալության տվյալներով՝ մարտկոցները բռնկվել են այն բանից հետո, երբ դրանք տեղափոխող բեռնատարը շրջվել է։ Տուժածների մասին տեղեկություններ չկան։
