«Գալաքսի» ընկերությունների խմբի Սուրբ Ծննդյան նվերը. վերականգնվել է Խրիմյան Հայրիկի կողմից արձանագրված երգը
ՏեսանյութերԲարի լուսո աստղ էրևաց, աղոթարան դռներն ի բաց»... այս տողերով է սկսում 1885թ.-ին Կաթողիկոս Ամենայն Հայոց Խրիմյան Հայրիկի կողմից արձանագրված ժողովրդական բանահյուսության այս բացառիկ կտորը, որը հայ մարդու հավատքի ու աշխատասիրության մասին է: 1970-ականներին ազգագրագետ, վաստակավոր արտիստ Հայրիկ Մուրադյանը ձայնագրում է այն արխիվի համար ու սովետական միության երկաթե վարագույրից այն կողմ հայերն առաջին անգամ լսում են այս երգը` հուզիչ, պարզ ու մաքրամաքուր: Սիմվոլիկ նշանակության այս ստեղծագործությունը ինքնության ու հավատքի պայքարի այս դժվարին ժամանակներում միավորել է ստեղծարար մասնագետների, արտիստների, երաժշտագետների, որոնք երեք ամիս շարունակ աշխատել են` կյանքի կոչելու «Գալաքսի» հիմնադիրների պարզ ու շիտակ գաղափարը` ամրապնդել ու վերագտնել Սուրբ Ծննդյան տոնի կենսական խորհուրդը ամեն հայ ընտանիքի համար:
«Մենք հավատում ենք հայ մարդու աշխատանքի ու աշխատասիրության ուժին: Մենք ցանկանում ենք, որ մեր ժողովուրդը միավորված լինի, հավատա ու ապավինի սեփական ուժերին: Այս ստեղծագործությունը կարևոր հաղորդագրություն ունի: Այն նկարագրում է մեր հավաքական կենսակերպը` աշխատել ու ստեղծել հավատով, աղոթքով ու բարությամբ: Մենք շատ կուզեինք, որ այս երգի հաղորդագրությունն ու բառերը հնչեն բոլոր հայ ընտանիքներում Սուրբ Ծննդին»,-ասել է «Գալաքսի» ընկերությունների խմբի համահիմնադիր, կառավարման խորհրդի համանախագահ Արտյոմ Խաչատրյանը:
Երգի ու վերջինիս պատմության ընտրության համար հաղորդակցության պրոֆեսիոնալ խումբ է աշխատել: Որպես ստեղծարար խնդիր սահմանվել է պահանջը` գտնել ու վերհանել ժողովրդի սրտից բխող որևէ պարզ երգ, որը կլինի դրական, կպատմի հայ մարդու կենսակերպը սեփական դիրքերից: Նախագծի ստեղծագործական պրոցեսը ղեկավարել է «ԱքսելՄոնդրիան և գործընկերներ» հաղորդակցական ընկերությունը, իսկ երգի գեղարվեստական մշակումը կատարել է հայտնի «Կաթիլ» բենդը:
«Իր տեսակի մեջ սա առաջին ու բացառիկ նախագիծն է Հայաստանում, որը էթնիկ ժողովրդական երգին ակադեմիական հնչողություն ու երաժշտական ձևավորում է տալիս: Ընտրանքում մենք ունեցել ենք շատ ավելի մեղեդային երգեր, բայց ընտրությունը կանգ առավ հայրապետի ստեղծագործության վրա: Մենք շատ կցանկանանք, որ այն սիրվի ու մարդիկ սեփական տարբերակներն առաջարկեն այս երգի»,-ասել է «Կաթիլ» բենդի համահիմնադիր Գրիգոր Դավթյանը:
Երգի կատարմանը մասնակցել են Ղ. Սարյանի անվան արվեստի դպրոցի երգչախմբի սաները, խմբավար՝ Գրիգոր Հարությունյանի ղեկավարմամբ: Երեխաներին ձայնակցել է «Կաթիլ» բենդի վոկալիստ Սևադա Համբարչյանը, գործիքավորումը ղեկավարել է Գրիգոր Քարտաշյանը: Երաժշտությունը ձայնագրվել է` տրամադրվելու հանրությանը բաց լիցենզիայով, որպեսզի ցանկացած հայ այն կարողանա օգտագործել ու դարձնել սեփականը: Տեսաշարի համար ընտրվել են ձյունասպիտակ հայոց լեռները, որպեսզի կադրերը զերծ լինեն ցանկացած ավելորդ պատկերից և ամբողջ ուշադրությունը լինի երգի կախարդական տողերին: Ստեղծագործական խումբը նախագծի վերաբերյալ նոր զարգացումներ է խոստանում, իսկ առայժմ հորդորում հնչեցնել «Բարի լուսո»-ն բոլոր հայ ընտանիքներում` հանուն հավատի ու միասնության:
«Գալաքսի» ընկերությունների խումբը Հայաստանի բացառիկ ընկերություններից է, որը տարեկան սոցիալական պատասխանատվության ծրագրերում մշտապես ներառում է կրթական, մշակութային, պատմական ժառանգության և հայալեզու մրցունակ բովանդակության ստեղծման նախագծերը: 1999-ի ի վեր ընկերության ծրագրերը ներառում են մոտ հարյուր տարբեր համագործակցություններ, հրատարակչական նյութեր ու գրքեր: Ընկերությունների խմբի հիմնադիրներն են Գուրգեն Խաչատրյանը, Արտյոմ Խաչատրյանը և Արամ Խաչատրյանը: Խմբի կազմում են հանդես գալիս ինչպես «Յուքոմ» հեռահաղորդակցության օպերատորն ու «Երևան Մոլ» առևտրաժամանցային համալիրը, այնպես էլ «ՓՈԼ» ֆրանսիական
սրճարանն ու «Քորթյարդ բայ Մարիոթ» հյուրանոցի` ի թիվս 15 բրենդների:
«Կաթիլ»-ը հայկական ինդիֆոլկ խումբ է, որը հմնադրվել է 2017 թվականին: Այն հայտնի է իր բազմաթիվ էթնիկ երգերի ժամանակակից կատարումներով: Խմբի 5 հոգանոց կազմը մենահամերգ է ունեցել Հանրային Ռադիոյի ստուդիայում, ՀՀ օպերային նվագախմբի հետ համատեղ մասնակցել Անկախության տոնի համերգին Զվարթնոց տաճարում ի թիվս այլ նշանակալի ներկայացումների: 2020 թվականին թողարկել է իր առաջին «Ակներ» ձայնասկավառակը:
«ԱքսելՄոնդրիան և գործընկերներ»-ը եվրոպական ցանցի անդամ, որակավորված հաղորդակցական ընկերություն է, որը ծառայություններ է մատուցում հեղինակության կառավարման, հանրային կապերի, բրենդինգային և մարկետինգային հաղորդակցության, տվյալների վերլուծության և հարակից ոլորտներում: Այն բազմաթիվ ստեղծարար նախագծեր է իրականացրել Հայաստանում` նոր լուծումներ ու նոր մտածողություն առաջարկելով շուկային:
