Լինում են դեպքեր՝ մարդկանց մեծ մասն առանց հացի են տուն գնում՝ գիշերվա 4-ից 5-ը հերթ կանգնելուց հետո. Ստեփանակերտի բնակիչ
Հասարակություն
Արցախի արդեն 258 օր շրջափակված է. Ստեփանակերտում նույնիսկ հաց գնելն է խնդիր դարձել: Մարդիկ ժամերով հացի համար հերթ են կանգնում եւ շատ ժամանակ էլ ձեռնունայն են տուն վերադառնում:
Ստեփանակերտի բնակիչ Սեյրան Մայիլյանը NEWS.am-ի հետ զրույցում պատմեց, թե ինչ է կատարվում այս օրերին Ստեփանակերտում, ինչ խնդիրներ են առաջանում հաց ձեռք բերելու ընթացքում:
«Կոնկրետ խնդիրը կայանում է նրանում, որ Ստեփանակերտում հացի խնդիրը կառավարությունը ոչ մի ձեւ չի կարողանում լուծել: Խնդրի էությունը կայանում է նրանում, որ մարդիկ մեկ օր հերթ են կանգնում, որ հացի համար հերթագրվել, հետո մի օր էլ հացի համար են հերթ կանգնում, արդյունքում կարող է ստացվել, որ իրենց հերթը չհասնի եւ առանց հացի տուն վերադառնան, կամ մեկ այլ հացի փուռ գնան, նորից հերթագրվեն ու սպասեն իրենց հերթին: Երբեմն ստացվում է այնպես, որ մարդկանց մեծ մասն առանց հացի են տուն գնում, մինչեւ գիշերվա 4-5-ը հերթ կանգնելուց հետո»,- ասաց նա:
Սեյրան Մայիլյանը կարծում է, որ հարցի լուծում կարող է լինել կտրոնով հացի տրամադրումը, այսինքն յուրաքանչյուր անձի հաշվով փռերին ալյուրի տրամադրում, որի հետեւանքով բոլորին էլ հաց կհասնի:
«Հիմա հացի հերթերին երեխաներն են հերթագրվում, որ գիերը հերթ կանգնեն, քանի որ մեծերը աշխատանքի բերումով չեն էլ կարողանում, բայց երեխաներն էլ հոգնում են ժամեր շարունակ հերթ կանգնել»,-ասաց նա:
Ստեփանակերտի բնակչի խոսքով՝ քաղաքաբնակների համար է հիմա դժվար բանջարեղեն եւ միրգ ճարելը, քանի որ նույնիսկ խանութներում էլ չկա, կամ շատ քիչ քանակությամբ է լինում:
«Նախ քիչ է միրգն ու բանջարեղենը, քանի որ հիմնականում թշնամու կողմից օկուպացված տարաածքներում էին մշակում, հիմա նույնիսկ գյուղերում էլ ոռոգման ջրի խնդիր կա, շատ ժամանակ չեն էլ կարողանում ոռոգեն, որ նորմալ բերք ստանան, հետո էլ տեղափոխեն քաղաք»,-ասաց նա:
Սեյրան Մայիլյանը նշում է, որ բնակիչների մեծ մասը անվտանգության երաշխիքներ ունենալու դեպքում կմնա Արցախում, բայց ոչ Արցախն Ադրբեջանի կազմում ներառվելու դեպքում:
«Ճիշտ է՝ այս վիճակը շատ է ազդում մարդկանց հոգեբանության վրա, բայց թեկուզ անվտանգ ապրելու մի փոքր հույս ունենալու դեպքում, մարդիկ կնախընտրեն այստեղ մնալ, քան դուրս գալ: Բայց մենք մեր կապը պետք է Հայաստանի հետ պահենք, ոչ մի դեպքում Ադրբեջանից ապրանքներ չենք ստանալու»,- եզրափակեց նա:
