ԶՊՄԿ-ն 70 տարի մեր երկրում ձևավորում և կերտում է արդյունաբերության մշակույթն ու լավագույն ստանդարտները․ ՀՀ էկոնոմիկայի նախարար

ՀՀ կառավարությունը և «Գեոպրոմոյնինգ» ընկերությունը համատեղ աշխատում են առկա համագործակցությունն ավելի խորացնելու և արտադրական շղթան ավելի մեծացնելու, ինչպես նաև Հայաստանում մաքուր պղնձի արտադրություն հիմնելու ուղղությամբ։  

«Արմենպրես»-ի տեղեկացմամբ՝ այս կարծիքը Զանգեզուրի պղնձամոլիբդենային  կոմբինատի 70-ամյակին նվիրված միջոցառման ժամանակ հայտնեց ՀՀ էկոնոմիկայի նախարար Վահան Քերոբյանը՝ ներկաներին շնորհավորելով նաև հանքագործի ու մետալուրգի օրվա կապակցությամբ։ 

Նախարարը հայտնեց, որ վերջերս, երբ Չինաստանում էր, այդ երկրի էկոնոմիկայի նախարարի տեղակալը նրան ասել է, որ Հայաստանն, ի դեմս ԶՊՄԿ-ի, հանդիսանում է Չինաստանի համար մոլիբդենի երրորդ մատակարարը։ Սա, ըստ Քերոբյանի, վկայում է այն մասին, որ մենք խոսում ենք ոչ միայն մարզի, համայնքի կամ Հայաստանի խոշոր ձեռնարկության, այլ աշխարհի մասշտաբով բավական մեծ նշանակություն ունեցող ընկերության մասին, որն արդեն 70 տարի մեր երկրում ձևավորում և կերտում է արդյունաբերության մշակույթն ու լավագույն ստանդարտները, ինչպես նաև այս բնագավառի ապագան։

«Հայաստանի կառավարությունը վերջին հինգ տարիներին մեծ ջանքեր է գործադրում, որպեսզի մեր երկիրը դառնա ներդրումների համար գրավիչ երկիր, և այժմ տեսանելի են կոնկրետ արդյունքներ։ Նախորդ տարի ՀՀ-ն ուղիղ օտարերկրյա ներդրումների առումով առաջին անգամ հատեց մեկ միլիարդ դոլարի սահմանաչափը, ինչը ռեկորդային ցուցանիշ է և ցույց է տալիս, որ ներդրումային միջավայրը բարելավելուն ուղղված հինգ տարիների ջանքերը տալիս են իրենց պտուղները։ Ընդհանուր ներդրումների առումով՝ անցյալ տարի ունեցել ենք 4,2 միլիարդ դոլարի ներդրումներ, որոնք կազմում են ՀՆԱ-ի մոտ 22 տոկոսը»,- տեղեկացրեց ՀՀ էկոնոմիկայի նախարարը։ 

Նրա խոսքով՝ կառավարության գլխավոր ջանքը ներդրումային միջավայրն ավելի բարենպաստ դարձնելն է, ինչը պայմանավորված է խաղաղության օրակարգով։ Նախարարն անդրադարձավ նաև Հոլանդիա կատարած այցին և Հաագայի Խաղաղության պալատում զետեղված որմնանկարին, որտեղ կնոջ մի ձեռքին ձիթենու ճյուղն է, իսկ մյուսին՝ մանուկ Պլուտոսը, ով հարստության ու բարեբերության աստվածն է, իսկ ձիթենու ճյուղը խորհրդանշում է խաղաղությունը, այսինքն՝  ակնհայտ է, որ միայն խաղաղությունը կարող է բերել բարեբերություն։ Քերոբյանի հավաստմամբ՝ այդ ուղղությամբ Հայաստանի կառավարության և անձամբ վարչապետի ջանքերն անպայման կտան ցանկալի արդյունք։  

ՀՀ կառավարությունն իրականացնում է բազմաթիվ ծրագրեր՝ ներդրումային միջավայրը խթանելու նպատակով։ Գլխավոր տնտեսական ծրագրերից մեկը վերաբերում  է ընդհանուր արդիականացմանը, որի միջոցով փորձ է արվում ընկերություններին խթանել և համոզել, որպեսզի նրանք ամրացնեն իրենց նյութատեխնիկական բազան՝ դառնալով ավելի արտադրողական։ 

«Վերջին մեկ տարվա ընթացքում ավելի քան 2000 ընկերություններ արդեն օգտվել են կառավարության ծրագրերից, և ավելի քան 300 միլիոն դոլարի ներդրումներ են արվել նոր հոսքագծերի մեջ, ինչպես նաև նոր սարքավորներ ձեռք բերելու համար, ինչը բնականաբար ուժեղացնում է այդ ընկերություններին՝ դարձնելով ավելի մրցունակ և ավելի պատրաստ միջազգային շուկաներում մրցելու իրենց խոշոր մրցակիցների հետ։ Շարունակում ենք ջանքեր գործադրել, որպեսզի ապահովենք տարեկան արդյունքը՝ 7-9 տոկոս տնտեսական աճը։ Գործադրվող ջանքերն անպայման իրենց արդյունքը կտան նաև առաջիկա տարիներին»,- եզրափակեց ՀՀ էկոնոմիկայի նախարարը։