Որպես Երևանի խնդիրները ամենօրյա ռեժիմով ուսումնասիրող, կարծում եմ, որ շատ կարևոր է ակտիվ ներգրավվածությունը նման միջոցառումներին և հավաքներին․ Վիկտոր Մնացականյան
Հասարակություն
Երևանի Կենտրոն վարչական շրջանի նախկին ղեկավար Վիկտոր Մնացականյանը ֆեյսբուքյան իր էջում գրում է․
Վերջերս Երևանում մասնակցել եմ «Զարգացրու քո քաղաքը» ուրբանիստական ֆորումին, որը կազմակերպել էր ՀՀ էկոնոմիկայի նախարարությունը և ՌԴ «ВЭБ.РФ» ու շատ հետաքրքիր և ճանաչված սպիկերներով օրինակ՝ « КБ Стрелка»-ի համահիմնադիր Ալեքսեյ Մուրատովը, «ПроГород» տարածքների նախագծման ընկերության ղեկավար Քսենիյա Տիտովան, ոլորտում հաջողություններ ունեցած մի քանի ռուսական քաղաքների քաղաքապետներ (Сысерть) , ովքեր կիսվեցին իրենց փորձով։
Մյուս Կարևոր միջոցառումը դա ԿՈՆԴԻ (կարելի է ասել) մաստեր պլանի շնորհանդեսն էր, որը վերջապես ներկայացրեց ամիսներ շարունակ Կոնդի հետ կապված ամենագրագետ ու մանրամասն կատարված աշխատանքը: Շնորհակալություն Նարինե Տյուտչևայի գլխավորած «Re-Школа»-ի թիմին հրաշալի ուսումնասիրության համար:
Երկու միջոցառումներն էլ հագեցած էին արժեքավոր գիտելիքների և փորձի փոխանակմամբ:
Այս հանդիպումների ընթացքում քննարկվեցին քաղաքի ինքնության, քաղաքաշինական, քաղաքի կառավարման մի շարք կարևորագույն հարցեր, ոլորտի այժմյան մարտահրավերներն ու հնարավորությունները:
Բայց ուզում եմ փաստենք, որ այս միջոցառումներին ՑԱՎՈՔ ներկա չէր Երևանի քաղաքապետարանի, Քաղաքաշինության կոմիտեի, Տարածքային կառավարման և ենթակառուցվածքների նախարարության որևէ ներկայացուցիչ։ Ներկա էին միայն մարզերից մի քանի քաղաքապետներ։
Սա կարևոր հարց է առաջացնում. մինչ մենք ժամանակ ու գումար ենք ծախսում նաև արտասահմանյան գիտաժողովներին մասնակցելու և միջազգային փորձ ուսումնասիրելու համար, ոլորտի պատասխանատուները ուղղակի անտարբեր են մեր քթի տակ տեղի ունեցող ու մեր խնդիրներին վերաբերող այսքան ակտուալ հարցերի քննարկումների հարցում էլ:
Որպես Երևանի խնդիրները ամենօրյա ռեժիմով ուսումնասիրող, կարծում եմ, որ շատ կարևոր է ակտիվ ներգրավվածությունը նման միջոցառումներին և հավաքներին։ Հաղորդակցվելով, լսելով և մասնագետներից ու փորձագետներից սովորելով է, որ մենք կարող ենք իսկապես հասկանալ ժամանակակից հնարավորությունները և հաղթահարել մարտահրավերները: Եվ, իհարկե, պետք է վերջապես կոտրենք անջրպետը տեսության և պրակտիկայի միջև՝ օգտագործելով նաև միջազգային գիտելիքները՝ տեղում փոփոխություններ կատարելու համար ու մի քիչ էլ հրաժարվելու համար հնացած ու ոչ արդյունավետ, ծախասատար մեթոդներից:
