«Ազատազէն»-ը շատ է կարևորում ռազմական պատրաստության դասընթացները

«Ազատազէնն» իրեն դիրքավորել է որպես Հայաստանում զենքի մշակույթի ձևավորմանը նպաստող ռազմակրթական ՀԿ, որի հիմնական նպատակներն են զենք կրելու մշակույթի և ռազմակրթական ենթակառուցվածքների զարգացումը, համապարփակ անվտանգային համակարգի կայացումը, օրենսդրական համապատասխան փոփոխությունների իրականացումը։ Փետրվարի 12-ին տեղի ունեցավ «Ազատազէնի» առաջին համագումարը՝ՀԿ լիիրավ և աջակից անդամների ու հյուրերի մասնակցությամբ։

44-օրյա պատերազմից, դրան մասնակցելուց հետո մարդիկ, որոնք հետագայում ստեղծել են «Ազատազէնը», որոշել են՝ պետք է հրաձգարան ունենալ, հիմքում, իհարկե, կրակային պատրաստության դասընթացների կազմակերպումն էր: Այսօր արդեն գլխավոր նպատակներից են պրակտիկ հրաձգարանի կառուցումը և հրաձգարանի շենքի շինարարությունը, հաջորդը՝ անօդաչուների օդանավակայանի ստեղծումը, որտեղ կողք-կողքի կլինեն մարդիկ, որոնք դեռ առաջին քայլերն են անում, և ավելի փորձառուները:

«Ազատազէնի» խորհրդի նախագահ Իշխան Գևորգյանը համագումարի վայր էր բերել «Ազատազէնի» թուրը, որը պատրաստել են Ուտիք նահանգի Գարդման գավառի Բանանց գյուղի զինագործները 19-րդ դարի սկզբին. «Ազատազէնի գաղափարները կրում էինք դեռ այն ժամանակ, երբ նույնիսկ չգիտեինք այդ բառը: Սա լինելու է ՀԿ-ի նորընտիր խորհրդի թուրը, ծառայելու է նրանց ազատազէնականությունը տարածելու բարդ ճանապարհին»,-ասաց Իշխանը: Շարունակեց՝ «Ազատազէնը» շատ է կարևորում ռազմական պատրաստության դասընթացները: «Սրտանց գնում ենք պատերազմ, բայց երբեմն չունենք այն բանաձևը, թե ինչ պետք է իմանա երկիր պաշտպանողը: Բուժօգնությունը գիտենք այնքանով որքանով... Տասից ավելի կետեր կան, որոնք պետք է հստակ սահմանվեն»:

ՀԿ-ի խորհրդի անդամ Հրանտ Մանասյանն ասաց՝ երբ դիպուկահարների առաջին մրցույթը կազմակերպվեց, դրան զուգահեռ մշակվում էր համապարփակ պաշտպանության և անվտանգության հայեցակարգը: «Պնդում էինք, որ մեր երկրին պետք է հաղթանակի հայեցակարգ»,-նշեց Հրանտը: Վերջինս ներկայացրեց, թե ինչ հսկայածավալ աշխատանք է կատարվել այս մեկ տարվա ընթացքում: Նրա խոսքով՝ «Ազատազէնի» ամենամեծ հպարտությունը հրահանգիչների թիմն է, որում ընդգրկված են պրոֆեսիոնալներ՝ ներկա և նախկին զինվորականներ:

ՀԿ-ն հստակ որոշում ունի՝ ֆինանսների մասով հաշվետու լինել թե՛ իր անդամների, թե՛ հասարակության առջև, ընդ որում՝ որոշում ունեն զարգանալ ոչ միայն նվիրատվությունների շնորհիվ, այլ նաև սեփական ծառայությունները մատուցելով:

ՀԿ-ի տնօրեն, հրաձիգ-ծրագրավորող Նաղաշ Բաղդասարյանը ներկայացրեց «Ազատազէնի» ռազմավարությունը՝ նախ և առաջ խոսելով ՀԿ-ի առաքելության մասին: «Իսկ առաքելությունը հետևյալն է՝ համախմբել մարդկանց զենքի մշակույթի և զինագործության զարգացման շուրջ՝ հանուն ինքնիշխան հայկական պետականության շարունակականության և հզորացման: Իսկ տեսլականը Հայաստանում զենքի մշակույթը կենցաղի մաս դարձնելն է: Զինագործությունը զարգացած և ինքնաբավ է, առկա է բավարար ներուժ ու դիմակայություն՝ խաղաղություն պարտադրելու համար»,-ընդգծեց Նաղաշը: Նա ցավով է նշում, որ ռազմական կրթությունը բավականին տխուր վիճակում է թե՛ կրթական հաստատություններում, թե՛ հասարակության մեջ. «Որպես ռազմավարական ուղղություն՝ նախատեսում ենք առաջիկա 5 տարիներին աշխատել առնվազն 100 մասնավոր և պետական դպրոցների հետ, իրագործել ՆԶՊ դասընթացի կիրառական գործառնական պարապմունքեր «Ազատազէնի» հրաձգարանում, նախատեսում ենք 10 մասնավոր և պետական բուհերի հետ ինտենսիվ աշխատանք վարել և այլն: Արդյունքում հուսով ենք հինգ տարի հետո ունենալ 30 հազար ազատազէն՝ մարդ, որը մարզված է, զինված և պատրաստ է մարտական գործողության»:

«Ազատազէնի» ծրագրերը շատ են, կա առաջիկա հինգ տարվա համար մշակված ռազմավարությունը, ՀԿ անդամները գիտեն իրենց անելիքները, սակայն դանդաղ է ընթանում պետական մարմինների հետ աշխատանքը: Բոլորն են պնդում՝ պետք է վերականգնել ու ամրապնդել մարդկանց մեջ այն մտածողությունը, որ իրենք են պատասխանատու այն տարածքի համար, որտեղ ապրում են և ստեղծագործում: Սրան է նաև ուղղված լինելու առաջիկա հինգ տարում 12 հրաձգարանների և 2 ուսումնական կենտրոնների բացումը: Բայց, իհարկե, կարևորագույն միտքը սեփական երկրի ու դրա անվտանգության համար պատասխանատվության ստանձնումն է:

Համագումարի ավարտին տեղի ունեցած ընտրությունների արդյունքում կազմակերպությունում ձևավորվեց նոր խորհուրդ և ընտրվեցին վերստուգողներ մեկ տարի ժամկետով, խորհուրդը ընտրեց խորհրդի նախագահ և ընկերության տնօրեն։ Տարեկան համագումարի ավարտին ընտրվեց կազմակերպության խորհրդի նոր կազմը։

Խորհրդի անդամներ ընտրվեցին Սպարտակ Կյուրեղյանը, Իշխան Գևորգյանը, Հրանտ

Մանասյանը, Գեղամ Չանդիրյանը, Դավիթ Նահատակյանը, Աննա Հովհաննիսյանը, Արթուր

Ավդալյանը, Տարոն Բաղդասարյանը, Անի Ղազարյանը, Անի Ալավերդյանը, Անդրանիկ Հակոբյանը, Սաթենիկ Մնացականյանը, Թովմասն Խաչատրյանը, իսկ վերստուգողներ՝ Արմեն Աթալյանը, Զավեն Գյուլխանդանյանը, Տիգրան Մխիթարյանը։ Խորհրդի նախագահ ընտրվեց Իշխան Գևորգյանը, իսկ կազմակերպության տնօրեն՝ Նաղաշ Բաղդասարյանը։

Լուսինե Առաքելյան