Հնդկաստանում գնդակահարել են 20 երեխա պատանդ վերցրած տղամարդուն
ՄիջազգայինՈստիկանները հնդկական Ուտար Փրադեշ նահանգում գնդակահարել են իր տանը 20 երեխա պատանդ վերցրած տղամարդուն, տեղեկացնում է ՌԻԱ «Նովոստի»-ն՝ հղում կատարելով India Today պարբերականին։
Ավելի վաղ լրատվամիջոցները տեղեկացրել էին, որ Ֆարուհաբադի բնակիչ Սուրեշ Բաթամը, որը նախկինում մեղադրվել էր սպանության համար, երեխաների է հրավիրել իր դստեր ծննդյան օրվա առիթով եւ նրանց պատանդ վերցրել։ Ընդհանուր առմամբ, գերության մեջ է հայտնվել 23 երեխա՝ 6 ամսականից մինչեւ 15 տարեկան, ինչպես նաեւ մի քանի կանայք։
Համագյուղացիներից մեկը փորձել է բանակցել հանցագործի հետ, բայց նա կրակ է բացել եւ վիրավորել նրան ոտքից։ Երբ Բաթամի տունը շրջապատել են ոստիկանները, նա սկսել է կրակել նրանց ուղղությամբ եւ ձեռքի նռնակ է նետել։
Չարագործը վերացվել է հատուկ գործողության ընթացքում, վիրավորվել է երեք իրավապահ։
Երեխաները, նախնական տվյալներով, չեն տուժել։
Պարբերականի տվյալներով՝ Բաթամը, որը ցմահ բանտարկվել էր մարդասպանության համար, ազատ էր արձակվել գրավով։
