Նախկին ռազմագերիներն ուղղակի քաղաքական հաշվարկների զոհ են. Ռուբեն Մելիքյան

Երեկ դատարանը մերժց քննիչի միջնորդությունը՝ երկարացնելու նախկին ռազմագերի Արման Խաչատրյանի կալանքի ժամկետը:

1or.am- զրուցակիցը իրավաբանական գիտությունների թեկնածու, «Իրավական ուղի» իրավապաշտպան հասարակական կազմակերպության նախագահ Ռուբեն Մելիքյանն է.

«Խոսքը վերաբերում է նոյեմբերի 16-ին տեղի ունեցած միջադեպի կապակցությամբ գերի ընկած մեր զինծառայողներին: Նոյեմբերի 16-ին մեր երկրում կտրուկ շրջադարձ կատարվեց ռազմագերիների նկատմամբ վերաբերմունքի մասով, և, եթե դրանից առաջ ռազմագերիները մեր եղբայրներն էին, հերոսներ էին, երկրի բարձրագույն ղեկավարությունը նրանց լուսանկարներն էր հրապարակում և ամեն ինչ անում նրանց հերոսացնելու համար, այդ օրվանից մյուս ծայրահեղության մեջ ընկանք, և այդ մարդիկ հայտարարվեցին հանցագործներ՝ Նիկոլ Փաշինյանի կողմից: Դրան անմիջապես հետևեց ազատ արձակվող ռազմագերիների նկատմամբ քրեական հետապնդումը: Ընդհանուր թվով վեց անձ ձերբակալվեց, այնուհետև կալանավորվեց: Մեր կազմակերպությունը ստաննձնել էր նրանցից երեքի պաշտպանությունը, և Արման Խաչատրյանը վերջինն էր, ով դեռ կալանքի տակ էր և ազատ կարձակվի մարտի 28-ին:

Բայց սա դեռ չի նշանակում, որ նրանց նկատմամբ մեղադրանքը հանվում է, նրանք շարունակում են մնալ մեղադրյալ, և դատարանի առջև պետք է կանգնեն՝ շատ յուրահատուկ մեղադրանքով: Երևի շատերը տեղյակ չեն, որ այս մարդկանց չի առաջադրվել ո՛չ հայրենիքի դավաճանության համար, ո՛չ թշնամու կողմն անցնելու, ո՛չ միտումնավոր գերի հանձնվելու մեղադրանք: Նրանց մեղադրանքը հնչում է հետևյալ կերպ՝ մարտական ծառայության կանոնները խախտելը, որն առաջացրել է ծանր հետևանքներ: Նախաքննությունը երբ ավարտվի, արդեն ավելի մանրամասն կարող ենք խոսել այս գործերի փաստերի վերաբերյալ»:

Մելիքյանի խոսքով՝ նախկին ռազմագերիներն ուղղակի քաղաքական հաշվարկների զոհ են.

«Մեր համոզմամբ՝ այս մարդիկ ուղղակի զոհ այն հաշվարկի, որ պետք է մեղավորներ գտնել՝ դիրքային, տարածքային կորուստների համար: Իրականում, այս պատմության մեջ այդ մարդիկ զոհ են, այլ ոչ թե հանցագործ, որովհետև մեր պետությունը նրանց պարզապես լքել էր: Մենք ամեն ինչ անելու ենք, որ այս մարդիկ արդարացվեն, հանրային դատավարությամբ ներկայացնելու ենք բոլոր վերաբերելի փաստերը և, վստահ եմ, հանրությունը կհամոզվի, որ այս մարդիկ չէ, որ պետք է մեղադրյալի աթոռին նստեն՝ մեր դիրքային և տարածքային կորուստների համար»:

Դիտարկմանը, թե իշխանությունը կարող է քավության նոխազ դարձնել այս տղաներին՝ հետագա նմանատիպ դեպքերը կանխելու համար, իրավաբանը պատասխանեց.

«Իշխանությունն ամեն ինչ անում են դրա համար, և ես չեմ կարծում, որ նրանք բարեխիղճ մոլորության մեջ են: Այս մարդկանց, այո, քավության նոխազ են դարձնում ոչ թե հետագա դեպքերից խուսափելու, այլ արդեն իսկ եղած դեպքերի համար մեղադրանքի սլաքները «փոքր» մարդկանց վրա ուղղելու համար: Մարդիկ մեղադրում են և արդարացիորեն են մեղադրում՝ սկսած վարչապետից, մինչև բարձրագույն զինվորական ղեկավարություն, թե ինչպես է այսպես ստացվել: Նրանք էլ, բնական է, մեղավորներ են փնտրում՝ իրենց արդարացնելու համար»: 

Մարիամ Նալբանդյան