Զինված ավազակային հարձակում՝ Երևանում. երիտասարդը կրպակից հափշտակել է գումար ու ծխախոտ
Իրավունք
Երեկ՝ մարտի 21-ին, զենքին նմանվող առարկայով ավազակային հարձակում է տեղի ունեցել Երևանում, հայտնում է Shamshyan.com-ը:
Ժամը 03:40–ի սահմաններում ոստիկանության կենտրոնական բաժին ահազանգ է ստացվել Երևանի բնակիչ Ա. Մ.-ից, ով հայտնել է, որ Մոսկովյան փողոցում գտնվող խանութներից մեկից զինված տղամարդը զենքի սպառնալիքով գողացել է գումար և ծխախոտ:
Ոստիկաններն ու քննիչները պարզել են, որ նույն օրը՝ ժամը 02:25-ից 02:30-ն ընկած ժամանակահատվածում նշված հասցեում գործող առևտրի կրպակին է մոտեցել մի երիտասարդ, աշխատակցին ցույց տվել զենքին նմանվող առարկա ու նրանից պահանջել է գումար և ծխախոտ:
Մերժում ստանալուց հետո հանցագործը հափշտակել է մոտ 23 հազար դրամ գումար և ծխախոտ ու դիմել փախուստի:
Իրավապահները պարզել են, որ կասկածյալը Երևանի բնակիչ, 24-ամյա Սամսոն Ղուկասյանն է: Նա ներկայացել է ոստիկանության կենտրոնական բաժին և ձերբակալվել է:
