Բնակարանն անհապաղ ազատելու վարձատուների անօրինական պահանջի վերաբերյալ. իրավաբան
Իրավունք
Ռոբերտ Հայրապետյանը ֆեյսբուքյան իր էջում գրում է.
Հարգելի վարձակալներ, հիշե՛ք
Բնակարանը անհապաղ լքելու կամ այլ կերպ ասած վարձակալության պայմանագիրը միակողմանի վաղաժամկետ դադարեցնելու վարձատուների պահանջն անօրինական է հետևյալ հիմքերով.
1. Վարձակալության պայմանագիրը, վարձատուի (տան տիրոջ) պահանջով, դատարանովկարող է վաղաժամկետ լուծվել, եթե` դուք բնակարանն օգտագործել եք պայմանագրի պայմանների կամ գույքի նշանակության էական կամ բազմակի խախտումներով, էականորեն վատթարացրել է բնակարանի վիճակը, պայմանագրով սահմանված վճարման ժամկետը լրանալուց հետո պարբերաբար կամ անընդմեջ երկու անգամից ավելի չի մուծել վարձավճարը. վարձակալության պայմանագրով սահմանված ժամկետներում, չեք կատարել գույքի հիմնական վերանորոգում , եթե պայմանագրով դա ձեր պարտականությունն է:
2. Եթե բախվել եք այնպիսի իրավիճակի, երբ նախապես կնքել եք պայմանագիր, պայմանագրի ժամկետն ավարտվել է բայց դուք շարունակել եք վարձակալել բնակարանը, ապա հիշեք, որ ժամկետի ավարտից հետո պայմանագրի չդադարեցումը ու գույքի օգտագործման շարունակականությունը համարվում է պայմանագրի վերակնքում անորոշ ժամկետով:
3. Այս դեպքում վարձատուն առնվազն երեք ամիս առաջ պարտավոր է ձեզ զգուշացնել վարձակալության պայմանագրի դադարեցման մասին:
Եթե այս պայմանները չեն պահպանվել, ապա վարձատուի գործողություններն անօրինական են:
Վերջում` անբարեխիղճ և փողամոլ վարձատուներին.
ՀՀ քրեական օրենսգիրքը սահմանում է պատասխանատվություն հարկերից խուսափելու համար, որոնք վստահաբար ձեր կողմից չեն վճարվում: Չզարմանաք, որ մի օր ձեր նոր ռուս վարձակալները կլորիկ ամսավճարի հետ միասին ձեզ փոխանցեն իրավապահ մարմիններից ստացված ծանուցագիրը:
