«Զվարթնոց» օդանավակայանում 29-ամյա տղամարդը դանակի սպառնալիքի տակ պահանջել է ապահովել իր չվերթը դեպի Ռուսաստան
Հասարակություն
SHAMSHYAN.com-ի տեղեկություններով՝ երեկ՝ փետրվարի 9-ին, արտակարգ դեպք է տեղի ունեցել «Զվարթնոց» միջազգային օդանավակայանում:
Ժամը 17:00–ի սահմանններում «Զվարթնոց» օդանավակայանի գծային բաժնի ծառայության վաշտի ոստիկանության ավագ սերժանտը մեկնման սրահում ծառայություն իրականացնելու ժամանակ նկատել է, որ 4-րդ հարկում գործող ավիաընկերությունը սպասարկող դրամարկղերից մեկի մոտ կասկածելի բան է տեղի ունենում:
Ոստիկանության ավագ սերժանտը, մոտենալով նշված վայր, նկատում է, որ մի քաղաքացի դանակի սպառնալիքի տակ ավիատոմս վաճառող ընկերության աշխատակցուհուց պահանջում է, որ իր համար չվերթ ապահովեն և իրեն տոմս տան, որպեսզի ինքը մեկնի Ռուսաստանի Դաշնություն:
Ոստիկանության ծառայողները այդ քաղաքացուն բերման են ենթարկում «Զվարթնոց» օդանավակայանի գծային բաժին, որտեղ պարզվում է, որ նա Լոռու մարզի բնակիչ, 29-ամյա Անդրանիկ Մ.-ն է:
Փաստի առթիվ հարուցվել է քրեական գործ ՝ ՀՀ քր օր-ի 175 հոդվածի 1-ին մասի (ավազակային հարձակում) հատկանիշներով:
Կասկածյալ Անդրանիկ Մ.-ն քննիչի որոշմամբ ձերբակալվել է և տեղափոխվել ոստիկանության Երևան քաղաքի վարչության ձերբակալվածների պահման վայր:
