Հայաստանը ես եմ․ յուրաքանչյուր հայ պետք է գիտակցի

Հայաստանը ես եմ։ Արցախյան պատերազմում կրած պարտությունը, իշխանության և ընդդիմության անհաշտ պայքարը, հանրային ծայրաստիճան բևեռացվածությունը որևէ լավ տեղ չեն կարող տանել մեր պետությունը։ Յուրաքանչյուր օր ականատեսն ենք դառնում իրար հոշոտող քաղաքական ուժերի, հանրության տարբեր շերտերի թշնամանքի դրսևորումների, որոնք սպառնում են ջլատել առանց այն էլ օրհասական վիճակում գտնվող մեր փոքրիկ երկիրը։ Մինչդեռ յուրաքանչյուր հայ պետք է գիտակցի, որ Հայաստանը ինքն է, Հայաստանը ես եմ, Հայաստանը դու ես։ Եվ մեզանից յուրաքանչյուրը պարտավոր է իր ամեն քայլը հաշվարկել՝ երկրին, պետությանը (չշփոթել օրվա իշխանության հետ), հայրենիքին չվնասելու, հնարավորության դեպքում աջակցելու, մեկ ավել քար դնելու՝ մեր երկրի հիմքերն ամրացնելու համար։

Քաղաքական ուժերը վեհ և բարձրագոչ կոչերով պաշտոնների կռիվ են անում, սեփական ազդեցության պայքար մղում, արտաքուստ կռվում իրար հետ, իսկ երեկոները թեյ ըմպում, իսկ հասարակությունն այդ ընթացքում չի կողմնորոշվում, չի ստանում իրեն հուզող հարցերի պատասխանները։ Եվ այդ հասարակությանը հետո մեղադրելը երեսպաշտության դրսևորում է։ Քաղաքական ուժերը իրենք պետք է ապրեն և աշխատեն այս գաղափարով՝ Հայաստանը ես եմ։ Իրենք պետք է մի կողմ դնեն անձնական, կուսակցական, նեղ խմբային ամբիցիաները, հատկապես այսօր՝ երկրի համար ծանրագույն պայմաններում, լծվեն խորը փոսից հանրությանը դուրս բերելու, բարոյահոգեբանական աջակցություն ցուցաբերելու, կրթելու, զարգացնելու, ապաքինելու, կյանքի որակը բարձրացնելու, ստեղծարար աշխատանքի հիմքերը դնելու համար։ Եթե յուրաքանչյուրն ապրի այս գաղափարով, հեռու չէ այն օրը, երբ հայ մարդը կրկին կկարողանա գլուխը հպարտ բարձրացնել, շտկել իր մեջքը, լավատեսորեն նայելու ապագային։ Հայաստանը ես եմ․․․

Արթուր Հարությունյան