Ազատ ոճային երկու ըմբիշ կմասնակցի ՕԽ վարկանիշային մրցաշարին
Սպորտ
Հայաստանի ազատ ոճի ըմբշամարտի հավաքականը Օլիմպիական խաղերի վարկանիշային մրցաշարին կմասնակցի երկու մարզիկով:
«Արմենպրես»-ի հաղորդմամբ` այս մասին հայտնում է ֆեդերացիան: Տոկիո-2020-ի համար վերջին վարկանիշային մրցմանը ազատ ոճայիններից կմասնակցեն 74 կգ քաշային Արման Անդրեասյանը և 86 կգ քաշային Հովհաննես Մխիթարյանը:
Ավելի վաղ հայտնի էր դարձել նաև հունահռոմեական ոճի ըմբիշների կազմը` Արմեն Մելիքյան (60 կգ), Կարեն Ասլանյան (67 կգ), Արթուր Շահինյան (87 կգ) և գերծանր քաշային կարգի Դավիթ Օվասապյան:
2020 թվականի մարտի 24-ին հայտնի դարձավ, որ Տոկիոյի 32-րդ ամառային Օլիմպիական խաղերը հետաձգվել են: Դրանք կմեկնարկեն 2021 թվականի հուլիսի 23-ին և կեզրափակվեն օգոստոսի 8-ին: Օլիմպիական խաղերը կպահպանեն իրենց անվանումը` Տոկիո-2020:
Հայաստանը մինչ այս ունի 6 օլիմպիական ուղեգիր. մարմնամարզիկ Արթուր Դավթյան, հունահռոմեական ոճի ըմբիշներ Արթուր Ալեքսանյան, Կարապետ Չալյան, ազատ ոճային ըմբիշներ Արսեն Հարությունյան, Վազգեն Թևանյան, բռնցքամարտիկ Կորյուն Սողոմոնյան:
