ԵԱ. Արման Անդրեասյանը դուրս եկավ կիսաեզրափակիչ
Սպորտ
Լեհաստանի մայրաքաղաք Վարշավայում ապրիլի 19-ին մեկնարկած ազատ ոճի ըմբշամարտի Եվրոպայի առաջնության առաջին մրցումային օրը Հայաստանն ունի 3 ներկայացուցիչ, որոնցից մեկը նվաճեց կիսաեզրափակիչի ուղեգիր:
Արման Անդրեասյանը (70 կգ) պայքարը սկսեց 1/8 եզրափակիչից, որտեղ 10:0 հաշվով վստահ հաղթանակ տարավ լիտվացի Արտեմ Աուգայի նկատմամբ: Քառորդ եզրափակիչում Անդրեասյանը մրցեց լեհ Կշիշտոֆ Օլենցինի հետ և հաղթեց 10:5 հաշվով: Կիսաեզրափակիչում հայ ըմբիշի մրցակիցը կլինի ռուս Իսրաիլ Կասումովը:
Գևորգ Թադևոսյանը (65 կգ) ևս մեկնարկեց 1/8 եզրափակիչից, որտեղ 1:2 հաշվով պարտվեց ադրբեջանցի Ալի Ռահիմզադեին:
Արման Ավագյանը (79 կգ) 1/8 եզրափակիչում մեկնարկեց Գերմանիան ներկայացնող Էդուարդ Տատարինովի նկատմամբ 10:0 հաշվով հաղթանակով, սակայն հաջորդ փուլում պարտվեց Սլովակիան ներկայացնող Ախսարբեկ Գուլաևին՝ 1:11:
Ազատ ոճի ըմբշամարտի Հայաստանի հավաքականի կազմում մրցավայր է մեկնել նաև նաև Հրայր Ալիխանյանը (74 կգ), որը պայքարի մեջ կմտնի ապրիլի 20-ին՝ 1/8 եզրափակիչում գոտեմարտելով ռուս Ռազամբեկ Ժամալովի հետ: Մարզպետ Գալստյանը (92 կգ) ծնկի վնասվածքի պատճառով բաց կթողնի Եվրոպայի առաջնությունը:
