Ապօրինի գույքի բռնագանձման օրինագծում արված փոփոխությամբ՝ գույքի բռնագանձման շեմը 25 մլն դրամից բարձրացվել է 50 մլն դրամ
Ազգային ժողովում ՀՀ արդարադատության նախարար Ռուստամ Բադասյանը երկրորդ ընթերցմամբ ներկայացրեց կառավարության կողմից ներկայացված «Ապօրինի ծագում ունեցող գույքի բռնագանձման մասին և կից ներկայացված օրենքների նախագծերի» փաթեթը, որով նախատեսվում է բռնագանձել այն գույքը, որի ձեռքբերումը չի հիմնավորվում օրինական եկամտի աղբյուրներով:
Նախարարը ներկայացրեց, որ նախատեսվում են իրավասու մարմնի գործունեության և քաղաքացիական դատավարության ընթացակարգային նոր կանոններ, որոնք թույլ կտան իրականացնել ակտիվների ուսումնասիրություն և հօգուտ պետության բռնագանձել օրենքի իմաստով չհիմնավորվող հարստությունը, իսկ իրավասու մարմինը կգործի Գլխավոր դատախազության կազմում: «Առաջինից երկրորդ ընթերցմամբ քննարկմանը նախագծում որոշակի փոփոխություններ են կատարվել»,-ասաց նա և ներկայացրեց, որ ըստ փոփոխության՝ ապօրինի ծագում ունեցող գույքի բռնագանձման շեմը 25 մլն դրամից բարձրացվել է 50 մլն դրամ:
Նախարարը պարզաբանեց՝ սա արվել է նրա համար, որ որևէ մեկը չխոսի այն մասին, թե արտագնա աշխատանքի մեկնածները կարող են ընկնել այս կարգավորման տակ:
«Անձինք, ում գույքը փոխանցվել է որպես ալիմենտ, կյանքին կամ առողջությանը պատճառված վնասի հատուցում, ազատվել են ստացված գույքը վերադարձնելու պարտականութունից՝ անկախ գույքի ծագման մասին իմանալու հանգամանքից: Հստակ նախատեսվել է, որ գույքի բռնագանձմամբ չեն դադարում գույքի առնչությամբ բարեխիղճ անձանց՝ այդ թվում գրավառուների իրավունքները: Ուսումնասիրության ժամկետի մասով արձանագրվել է, որ ուսումնասիրությունը սկսելուց առաջ պետք է ներառի առավելագույնը նախորդող 10 տարին, իսկ բացառիկ դեպքում, երբ պահպանվել են գործի համար էական ապացույցները, ավելի երկար, բայց սահանափակվելով 1991 թվականից հետո ընկած ժամանակահատվածով: Ավելացվել են անձանց իրավունքների պաշտպանության հավելյալ երաշխիքներ»,-ասաց նա:
Ռուստամ Բադասյանը նկատեց, որ ընդդիմությունը նախորդ նիստում խորհրդարանական մեծամասնությանը մեղադրում էր նախորդ խորհրդարանի մեծամասնության դիրքորոշումը շարունակելու մեջ և նշեց. «Իսկ ինչո՞վ է զբաղված խորհրդարանական ընդդիմությունը հիմա, ինչո՞ւ չի ուզում, որ ներդրվեն բոլոր գործիքները, որոնք արդյունավետ են կոռուպցիայի դեմ պայքարի համար»:
«Բարգավաճ Հայաստան» խմբակցության պատգամավոր Միքայել Մելքումյանը հայտարարեց, թե ժամկետների հետ կապված խնդիր է տեսնում և նշեց, որ պետք է նայել ավելի ընդլայնված տեսքով: «Մինչև 1993-ի նոյեմբերը գործել է ռուբլի, շատ բարդ է լինելու դրա գնահատումը»,-ասաց նա:
«Լուսավոր Հայաստան» խմբակցության պատգամավոր Արկադի Խաչատրյանը նախ հիշեցրեց, որ ԼՀԿ-ն առաջին քննարկմանը դեմ է քվեարկել և ներկայացրել է 27 կետից բաղկացած առաջարկություններ: «Դրանց մի մասն ընդունվել են, սակայն խմբակցության որոշ մտահոգություններ չեն փարատվել: Օրինակ՝ նախկինում կատարված գործարքների մասով պետք է որոշակի ժամկետ սահմանվեր, որի ընթացքում կարող են այդ բռնագանձման գործընթացներն իրականացվել, որպեսզի դա անվերջ չլիներ: Այստեղ չենք կարողացել համաձայնության գալ: Պահանջում և խնդրում էինք, որպեսզի ներառվեր նաև ապօրինի գույքի կամավոր հայտարարագրման մեխանիզմ: Սակայն այդ հարցը չի համաձայնվել»,-ասաց նա:
