Թրամփը հայտարարել է, որ Մեգան Մարքլը «ոչ մի բանի պիտանի չէ»
ԱՄՆ նախկին նախագահ Դոնալդ Թրամփը քննադատել է Սասեքսի դքսուհի Մեգան Մարքլին հեռուստահաղորդավարուհի Օփրա Ուինֆրիի հետ հարցազրույցի պատճառով, հայտնում է Fox News-ը:
Համապատասխան հարցազրույցը տեսնելուց հետո քաղաքական գործիչը հայտարարել է, որ Մարքլը «ոչ մի բանի պիտանի չէ»:
Թրամփի նախկին ավագ խորհրդական Ջեյսոն Միլլերի խոսքով՝ նախկին նախագահը նախ մտադրվել է հրապարակայնորեն արտահայտվել դքսուհու խոսքի մասին, հետո միտքը փոխել է: Միլլերը քաղաքական գործչին հիշեցրել է բրիտանացի հեռուստահաղորդավար Փիրս Մորգանի ճակատագրի մասին, որը հեռացվել է այն բանից հետո, երբ բացասաբար է արտահայտվել արքայազն Հարիի եւ նրա տիկնոջ մասին:
Հարցազրույցի թողարկումից հետո Թրամփը հայտարարել է, որ Մորգանին աջակցում է:
Մարտի 8-ին CBS հեռուստաալիքը հարցազրույց էր հեռարձակել, որը արքայազն Հարին եւ Մեգան Մարքլը առաջին անգամ տվել էին ԱՄՆ տեղափոխվելուց հետո: Սասեքսի դքսի խոսքով՝ իր տիկնոջ առաջին հղիության ժամանակ թագավորական ընտանիքի որոշ անդամներ մտահոգություն էին հայտնել իրենց ապագա որդու՝ Արչիի մաշկի գույնի կապակցությամբ: Մարքլը հավելել էր, որ մտածել է ինքնասպանության մասին՝ կապված բրիտանական մամուլում հետապնդումների հետ:
Դրան արքայազն Ուիլյամը պատասխանել է, որ թագավորական ընտանիքում ռասիզմը տեղ չունի:
