Ողբերգական դեպք Երևանում. Քիչ առաջ հիվանդանոցում ծննդկան է մահացել. լարված իրավիճակ է
Shamhshyan.com-ը գրում է. Այս պահին Երևան քաղաքի «Բեգլարյան բժշկական կենտրոն» ՓԲԸ-ի ծննդատան բակում են հավաքվել Արմավիրի մարզի Նոր Կեսարիա գյուղի մեծ թվով բնակիչներ, ովքեր պահանջում են հստակ պատասխան, թե ինչի հետևանքով և ում պատճառով է իրենց գյուղի բնակչուհի 30-ամյա Նելլի Արշակյանը, որ առողջ բերվել է նշված ծննդատուն, այսօր հայտնել են, որ մահացել է։ Ֆոտոլրագրող Գ․ Շամշյանի հետ զրույցում՝ մահացածի քույր Բելլան ասում էր․ «Հունվարի 31-ին Նելլիին, ով պետք է 3-րդ երեխան ունենար, առողջ, առանց որևէ գանգատի բերել ենք նշված ծննդատուն։ Հետազոտել են, և փետրվարի 1-ին աղջիկ է ունեցել։ Ծննդատնից մեզ տեղեկացնում են, որ և՛ մայրը, և՛ երեխան լավ են, ոչ մի առողջական խնդիրներ չունեն։ Մենք էլ հարազատներով գնում ենք տուն, աչքալուսանք տալիս ազգուտակին, որ Նելլին առողջ աղջիկ է ունեցել։ Այսօր՝ առավոտյան ժամը 8-ին, ծննդատնից զանգահարում են և ասում, թե Նելլիի վիճակը վատացել է, ու ամուսնուն խնդրում են, որ գա ծննդատուն։ Ու արդեն հարազատները, գալով այստեղ, իմանում են, որ առողջ ծննդկանը, ում հետ, ի դեպ, ծննդաբերությունից հետո խոսել է քույրը, ոչ մի գանգատ չի հայտնել, ամուսնուն հայտնում են, որ նա մահացել է։ Հազարատները կարկամած մի պահ չեն ուզում հավատալ այդ լուրին, սակայն հետո պահանջում են հանդիպում ծննդատան գլխավոր բժշկի և բուժող բժշկի հետ, բայց՝ ապարդյուն։ «Ասես՝ հօդս ցնդած լինեն։ Մենք գիտենք, որ Նելլիին հետ չենք բերի, բայց ուզում ենք, որ մեղավորները, որ հաստատ կան մեղավորներ, պատժվեն, որպեսզի հետագայում մեր ընտանիքի նման ուրիշ ընտանիքներ այս ցավը չապրեն։ Ո՞վ է տեսել, որ 21-րդ դարում մարդուն առողջ բերես ծննդատուն, առանց առողջական խնդիրներ ունենալու երեխա լույս աշխարհ բերի, իսկ ժամեր անց, ծննդատունն ասես սև թուղթ լինի, մեզ այդ ցավալի լուրն է հայտնում։ Արդեն մի քանի ժամ է ծննդատան մուտքի մոտ կանգնած ենք և ուզում ենք հանդիպում պատասխանատուների հետ, որպեսզի ստանանք պարզաբանում, բայց՝ անօգուտ»,- նշում էր մահացած ծննդկանի քույրը։ Քիչ առաջ քույրը պարզել է նաև նարկոզ տվողի և ներարկում կատարող քույրի ինքնությունը, բայց մեզ պատասխանում են, թե նարկոզ տվող Ալնա Կզլգյոզյանն ու Անահիտ Հայրապետյանը գիշերն են աշխատել, գնացել են տուն։ Մենք վստահ ենք, որ մեր առողջ քրոջը չափաբաժնից ավելի ներարկում են արել, ինչի հետևանքով ինքնազգացողությունը վատացել է ու մահացել։ Ֆոտոլրագրողի հետ զրույցում՝ ծննդկանի ազգականը՝ Ալվարդ Ղազարյանն էլ ասում էր․ «Երբ իմացել եմ դեպքի մասին, զանգահարել եմ «Բեգլարյան» ծննդատուն։ Իմ հեռախոսազանգին պատասխանել է կադրերի բաժնի պետ ներկայացած ինչ-որ կին, ով ներկայացավ, որ աշխատում է կադրերի բաժնի պետ։ Ես խնդրել եմ, որ տան գլխավորի կոորդինատները, որպեսզի նրա հետ պարզենք դեպքի հանգամանքները, բայց նա հրաժարվեց անգամ անունը տալ։ Որից հետո այդ կնոջ հեռախոսով ինձ պատասխանում է մի տղամարդ, ում ես հուզված հայտնեցի մեր ընտանիքի տեսակետը, որ առողջ ծննդկանին սպանել եք։ Իսկ այդ տղամարդը, մեր վիշտը կիսելու փոխարեն հեռախոսով պատասխանում է, թե գիտեք՝ ես ով եմ։ Դուք ինձ ոչինչ չեք կարող ասել, ինչ ուզեմ կանեմ ու անջատում է հեռախոսը։ Հիմա ուզում ենք հավատալ, որ մեղավորը կամ մեղավորները կպատժվեն, հակառակ դեպքում կարող ենք պնդել, որ ոչ մի բան էլ չի փոխվել։ Որոշ վայ բժիշկների մեղքով ընտանիքներ են ցավ ապրում»։ Ֆոտոլրագրողը հայտնում է, որ մահացած ծննդկանն ունի 2 անչափաս տղաներ, ապագա զինվորներ, և երեխաները ծնողներից շատ էին ուրախացել, երբ իմացել էին, որ քույրիկ են ունեցել։ Անհամբեր սպասում էին, թե հայրը մայրիկին ու քույրիկին երբ է բերելու տուն։ Ֆոտոլրագրողը հայտնում է նաև, որ ծննդատանը, տեսնելով մեծ թվով բազմություն է հավաքվել մուտքի մոտ, դուռը ներսից այնպես են զմռսել, որ մարդիկ այլևս չեն կարողանում մտնել ներս։ Նշված ծննդատուն են ժամանել Ոստիկանության Կենտրոնական բաժնի օպերատիվ խումբը՝ հետաքննչական բաժանմունքի հետաքննիչի գլխավորությամբ, ում կողմից փաստի առթիվ նյութեր են նախապատրաստվում։ Հետաքննիչի որոշմամբ՝ նշանակվել է դատաբժշկական փորձաքննություն։
