«Ո՞վ է Անդրանիկ Սողոյանը… լավ, ախպոր պես». Սասուն Միքայելյանը՝ օրենքով գող Զապի մասին
Օրեր առաջ քրեակատարողական հիմնարկից ազատ արձակվեց քրեական հեղինակություն Անդրանիկ Սողոյանը՝ Զապ մականունով:
168.am-ին հասած տեղեկություններով՝ նախաքննական մարմինն անգամ չէր միջնորդել խափանման միջոց կալանքը երկարաձգելու հարցով:
Ենթադրաբար, խոսքը վերաբերում է 2020թ. օգոստոսի 31-ին ՀՀ Քննչական կոմիտեի տարածած այն հաղորդագրությանը, ըստ որի՝ «քննությամբ ձեռք բերված փաստական տվյալների համաձայն՝ քրեական աստիճանակարգության բարձրագույն կարգավիճակ ունեցող անձը՝ «Զապ Լենինականսկի» մականվամբ հայտնի «օրենքով գողը», 2020թ. փետրվարի 22-ից սկսած ղեկավարել է քրեական ենթամշակույթ կրող խմբավորում՝ դրա կողմից հետապնդվող նպատակների իրականացմանն ուղղված գործողություններ կատարելու, մասնավորապես՝ իր անօրինական ազդեցությունն օգտագործելով, մասնավոր հարցին առնչվող խնդիրը լուծելու համար քրեական ենթամշակույթ կրող խմբավորման անդամներ հանդիսացող անձանց տալով հանձնարարություններ»:
ՔԿ հաղորդագրության համաձայն՝ ձեռք բերված բավարար ապացույցների համակցությամբ՝ «Զապ Լենինականսկի» մականվամբ հայտնի քրեական աստիճանակարգության բարձրագույն կարգավիճակ ունեցող անձին մեղադրանք էր առաջադրվել՝ ՀՀ քրեական օրենսգրքի 223.2-րդ հոդվածի (քրեական ենթամշակույթ կրող խմբավորում ստեղծելը կամ ղեկավարելը) 2-րդ մասի 5-րդ կետով: Վերջինս կալանավորվել էր:
Ըստ մեզ հասած լուրերի՝ Անդրանիկ Սողոյանի՝ ազատության մեջ հայտնվելու գործում մեծ է ՀՀ Ազգային ժողովի «Իմ քայլը» իշխող խմբակցության պատգամավոր, Երկրապահ կամավորականների միության նախագահ Սասուն Միքայելյանի դերը, ով միջնորդել է, որ վերջինիս կալանքի միջնորդությունը չներկայացվի: Մեր աղբյուրներն անգամ խնդրի լուծման գումարային չափ էին նշում:
Փորձեցինք տեղեկությունը պարզել հենց Սասուն Միքայելյանից: Ուզում էինք հարցնել՝ ճի՞շտ են արդյոք այն լուրերը, որ ինքն է միջնորդել Անդրանիկ Սողոյանի ազատ արձակման հարցում, ի՞նչ առնչություն ունի այդ պատմության հետ, առհասարակ ճանաչո՞ւմ է վերջինիս, թե՞ ոչ, և եթե այո, ի՞նչ հարաբերություններ ունեն նրանք:
Սասուն Միքայելյանը, սակայն, հեռախոսազրույցում կատեգորիկ կերպով հրաժարվեց պատասխանել մեր հարցերին, ասաց, որ որևէ հարցի չի պատասխանելու, և, որ առաջիկայում հանդես կգա հանրային խոսքով:
Հատուկ նշեցինք, որ հարցը բանակին չի վերաբերում, պարզապես կոնկրետ թեմայի վերաբերյալ իր անունն է շահարկվում:
«Շատ բան կարող են կապել ինձ հետ, ելույթ կունենամ, ամեն ինչ պարզ կլինի»,- պատասխանեց Սասուն Միքայելյանը, ապա հետաքրքրվեց, թե ո՞վ է Անդրանիկ Սողոյանը: Լսելով մեր պատասխանը՝ օրենքով գող «Զապը», Միքայելյանն ասաց. «Լավ, ախպոր պես, եղավ»:
Հիշեցնենք, որ Անդրանիկ Սողոյանը 2009 թվականի ապրիլին ձերբակալվել էր Պրահայում. մունիցիպալ դատարանի կողմից նա հեռակա դատապարտվել է 22 տարվա ազատազրկման՝ սպանության և շորթման մեղադրանքներով, և նրա նկատմամբ հայտարարված էր միջազգային հետախուզում: 2010թ. հոկտեմբերին, սակայն, Չեխիայի դատարանը նրան ազատ էր արձակել, և նա վերադարձել էր Գյումրի: 2011 թվականի ապրիլին Պրահայի գերագույն դատարանը լրացուցիչ քննության էր վերադարձրել Սողոյանի գործը:
Ի դեպ, 2019թ. ապրիլին Նիկոլ Փաշինյանն անդրադարձել էր Անդրանիկ Սողոյանի արտահանձնման թեմային:
«Հայաստանում այժմ կա մի մարդ, ով բոլորի կողմից հայտնի է՝ որպես հանցագործ, և գտնվում է հետախուզման մեջ, սակայն սահմանադրությամբ ամրագրված կետերով հնարավոր չի լինում արտահանձնել նրան, քանի որ նա ունի ՀՀ անձնագիր»,- ասել էր նա՝ հավելելով, որ, եթե մենք չենք կարողանում հանցագործին արտահանձնել Չեխիային, ապա դա չի նշանակում, որ այդ երկրի դեմ որևէ խնդիր կա:
