Շանս ունենք աշնանը գտնվել հաղթահարած վիճակում. Փաշինյան
Մենք արմատապես այս խնդիրը լուծելու շանս ունենք այսօր։ Այս մասին կառավարության արտահերթ նիստի ժամանակ ասաց ՀՀ վարչապետ Նիկոլ Փաշինյանը։
«Այսօր անցնելով այս դժոխքի միջով, ունենալով 800 մահ կորոնավիրուսի պատճառով և 234 մահ այլ պատճառով, բայց կորոնավիրուսով հիվանդ քաղաքացիների շրջանում, մենք այսօր շանս ունենք աշնանը գտնվել բոլորովին ուրիշ վիճակում։ Այսինքն հաղթահարած վիճակում լինել անկախ նրանից, թե աշխարհում ինչ կկատարվի։ Դա այդպես կլինի, եթե մեր ռազմավարությունը ճիշտ շարունակենք իրագործել։ Եթե մենք դիմակի կրման պատշաճ մակարդակ ապահովենք, կարող ենք համարել, որ գործնականում կորոնավիրուսի հետ կապված խնդիրը լուծել ենք»,-ասաց վարչապետը։
Վերջինս նշեց, որ պատրաստվում են սեպտեմբերի 15-ից ամբողջ հանրակրթությունը բացել։ Բուհական համակարգի հետ կապված քննարկումները դեռ շարունակվում են. «Այդտեղ անխուսափելիորեն թվերի որոշակի աճ լինելու է։ Մեր հիմնական ռիսկը դա է, եթե կանոնները պատշաճ պահենք, թվերի աճը կլինի այնպիսին, որ մեր այսօրվա խոսակցության բովանդակությունը չի փոխվի։ Եթե պատշաճ կարգապահություն չպահվի, նորից վերադառնալու ենք ճգնաժամային իրավիճակի»,-նշեց Նիկոլ Փաշինյանը։
