Ջանք չենք խնայում, որ ՀՀ-ում զարգանա ավտոսպորտը. Հայաստանի կարտինգի առաջին թիմը Դուբայում առաջին մրցանակն է շահել
Спорт
Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Վերջերս Դուբայում կայացած կարտինգի 24-ժամյա մրցույթում Հայաստանն առաջին անգամ ներկայացել է ազգային թիմով. «Գորոյան ռեյսինգ»-ը 42 երկրների մրցակցությունում գրավել է մրցանակային 3-րդ հորիզոնականը՝ բարձր պահելով մեր երկրի պատիվը։
Ավտոմոբիլային սպորտում միջազգային մեծ ճանաչում ունեցող ավտոարշավորդ Արթուր Գորոյանը մեծ ջանքեր է ներդնում ավտոսպորտը Հայաստանում զարգացնելու համար։
Արթուր Գորոյանը Հայաստանի ավտոմոբիլային սպորտի ֆեդերացիայի նախագահ Արսեն Մանուկյանի, Բելառուսի ավտոմոբիլային ֆեդերացիայի փոխնախագահ Հայկ Սիմոնյանի և տարբեր երկրներում ապրող ընկերների հետ Հայաստանում ստեղծել է ավտոմոբիլային սպորտի առաջին ազգային թիմը։
Արդեն Երևանում կայացած մամուլի ասուլիսի ժամանակ «Գորոյան ռեյսինգ»-ի հիմնադիր Արթուր Գորոյանը պատմեց, որ 1 տարի առաջ, երբ տղաներով դարձյալ Երևանում էին, ցանկություն առաջացավ կարտինգի մի թիմ ստեղծել, մասնակցել որևէ մրցման և ցույց տալ, որ կարող են զրոյից սկսել և հաջողություն արձանագրել։
«Սկսեցինք թիմի կազմավորումից։ Կես տարում նրանց սովորեցրինք կարտինգի այբուբենը՝ տիրապետել կարտին, այնուհետև, աստիճանաբար նաև սկսեցին յուրացնել արագ վարելու կանոնները և նրբությունները։ Ու գնացինք Դուբայ՝ մասնակցելու համաշխարհային սերիային, որտեղ հանդես է գալիս կարտինգի էլիտան։ Մասնակցում էր 42 թիմ։ Ու հենց առաջին փորձով 3-րդ մրցանակային տեղը գրավեցինք։ Այդպես ապացուցեցինք նախևառաջ ինքներս մեզ, որ Հայաստանում չունենալով անհրաժեշտ քանակությամբ կարտոդրոմներ, կարտինգի չեմպիոններ, չունենալով տեղացի պրոֆեսիոնալ մարզիչներ, մենք կարող ենք սկսել և հասնել մինչև վերջ։ Դրա համար գտանք այլ երկրներում ապրող պրոֆեսիոնալ արշավորդ, մարզիչ, մեր հայրենակիցների և նրանց աջակցությամբ հասանք մեր առջև դրված նպատակներին»,- ասաց «Գորոյան ռեսինգ» թիմի հիմնադիրը։
Նա նաև նշեց, որ Հայաստանում մարդկային ներուժ կա, որն ի վիճակի է հաղթահարել ցանկացած խոչընդոտ, անել ավելին։
«Մեր թիմի անդամները ծանրագույն մարզումային շրջափուլեր են հաղթահարել ու հասել են իրենց նպատակին։ Իսկ նպատակը ոչ այնքան արագությունն էր կամ ինչ-որ առումով հաղթելը, այլ մինչև վերջ գնալը։ Հայաստանում շատ են այդպիսիք տարբեր ոլորտներում։ Ես դա այստեղ տեսել եմ ոչ միայն անմիջապես կարտինգիստների մեջ։ Այդպիսի մարդիկ կային մեզ շրջապատողների մեջ։ Կարտոդրոմի աշխատողներ կային, որ գալիս, աշխատում էին անվճար։ Մի մասը դրոշներն էր կառավարում, մյուս մասն օգնում էր այլ տեղերում, որտեղ դրա կարիքը կար»,- հավելեց նա։
Ավտոմոբիլային սպորտը՝ մասնավորապես կարտինգը, Հայաստանում սկսել է արագ տեմպերով աշխուժանալ, իր հերթին նկատեց թիմի անդամ Ռոդիոն Կռիլովը։
Սակայն, ըստ նրա, այս սպորտաձևը զարգացնելու համար իրենք մի շարք խնդիրների են հանդիպում։ Դրանցից մեկը հովանավորների բացակայությունն է։
«Տպավորություն է, որ Հայաստանում բիզնեսի մարդիկ մտածում են, թե բոլորն իրենցից գումար են ուզում։ Ես ուզում եմ, որ բոլոր ընկերությունները, որոնք հետագայում հնարավոր է՝ կցանկանան մեզ աջակցել, իմանան․ մենք չենք առաջարկում՝ մեզ գումար տան ու գնանք ինչ-որ մի տեղ մրցման մասնակցելու։ Մենք հնարավոր բոլոր հովանավորներին առաջարկում ենք՝ եկեք իրար հետ աշխատենք։ Մենք ձեր ապրանքանիշը առաջ տանենք արտասահմանում, տվյալ պարագայում՝ Դուբայում, և դրա դիմաց հետագայում մենք ինչ-որ աջակցություն ստանանք»,- ընգդծեց Ռոդիոն Կռիլովը։
Ոլորտի խնդիրների մասին խոսելիս էլ Հայաստանի ավտոմոբիլային սպորտի ֆեդերացիայի նախագահ Արսեն Մանուկյանն արձանագրեց, որ ավտոմոբիլային սպորտը նաև անվտանգ երթևեկություն է, պարտադիր պետք է բարձր մակարդակով տիրապետել ճանապարհային երթևեկության, ավտոմեքենա վարելու պարտադիր կանոններին. սա կբերի ավտոպատահարների թվի նվազմանը։
«Գորոյան ռեյսինգ»-ը հաջորդ տարի էլ ջանք չի խնայելու ավտոմոբիլային սպորտը զարգացնելու համար։
Արթուր Գորոյանը ևս մեկ անգամ պատկան մարմինների և ներդրողների ուշադրությունը հրավիրեց այս սպորտաձևի վրա՝ ընդգծելով, որ հիմա կարտինգով մարզվելու բազմաթիվ ցանկացողներ կան, միայն թե պետք է իրենց կողքին ամուր կանգնել, որ հնարավոր լինի ոլորտն արագ զարգացնել և աշխարհում մեծ հաջողությունների հասնել։
