Եվրոպան ցանկանում է աշխատել ՆԱՏՕ-ի պահպանման ուղղությամբ՝ չնայած Իրանի հարցում առկա տարաձայնություններին. Մերց
Международное
Գերմանիայի կանցլեր Ֆրիդրիխ Մերցը շաբաթ օրը հայտարարել է, որ Եվրոպան ցանկանում է աշխատել ՆԱՏՕ-ի Հյուսիսատլանտյան դաշինքի գործունեության պահպանման ուղղությամբ՝ չնայած Միացյալ Նահանգների հետ ունեցած տարաձայնություններին, որոնք ի հայտ են եկել Իրանի դեմ պատերազմի պատճառով, հայտնում է Reuters-ը։
Պաշտպանական ծախսերի և միգրացիոն քաղաքականության հարցերում Եվրոպայի հասցեին ԱՄՆ-ի քննադատություններից հետո առաջացած լարվածությունն էլ ավելի է սրվել, երբ Գերմանիան և եվրոպական այլ երկրներ հրաժարվել են աջակցել փետրվարի վերջին սկսված Իրանի դեմ ԱՄՆ-ի և Իսրայելի պատերազմին։ «Մենք իսկապես ցանկանում ենք պահպանել այս դաշինքն ապագայի համար»,- Շվեդիայի վարչապետ Ուլֆ Քրիստերսոնի հետ համատեղ մամուլի ասուլիսի ժամանակ ասել է Մերցը։
Նա նաև նշել է, որ Շվեդիան և Ֆինլանդիան ամրապնդել են դաշինքի եվրոպական հիմքը։
«Մենք գիտենք, որ կան որոշակի տարբերություններ։ Մենք գիտենք, որ բոլորս էլ դժվարությունների ենք բախվում, բայց մեր վերջնական նպատակն է՝ վերջ դնել այս հակամարտությանը և երաշխավորել, որ Իրանը չկարողանա միջուկային զենք արտադրել։ Եվ այդ նպատակը Ամերիկայի ու Եվրոպայի ընդհանուր նպատակն է»,- նշել է Գերմանիայի կանցլերը։
Մերցն ասել է, որ գլխավոր խնդիրը ոչ թե զորքերի թվաքանակն է, այլ «նպատակների միասնությունը», և որ ԱՄՆ-ի շահերից է բխում ՆԱՏՕ-ում ուժեղ եվրոպական բաղադրիչ ունենալը։
«Մենք նախկինի պես շահագրգռված ենք, որ ամերիկյան բանակը և ամերիկյան ռազմական աջակցությունը լինեն մեր կողքին։ Այսպիսով, սա այն է, ինչը մեզ միավորում է, և ներկայումս մենք փորձում ենք հասնել դրան»,- ասել է Գերմանիայի կանցլերը։
Նախորդ ամսվա ընթացքում Մերցը հայտարարել էր, որ Իրանը «նվաստացնում է» ԱՄՆ-ին, ինչից հետո Թրամփը շատ բուռն արձագանքեց այդ հայտարարությանը և կարգադրեց այնտեղ գտնվող ԱՄՆ զինվորների քանակը կրճատել 5000-ով, ինչից հետո Թրամփը չեղարկեց նաև «Tomahawk» հեռահար հրթիռների պլանավորված տեղակայումը։
