Աշխատանք, որը դառնում է տնտեսության հենասյուն. «Աթենք» մսամթերք

Մայիսի 1-ը սովորաբար ընդունված է համարել տոնական օրացույցի մաս, սակայն տնտեսական տեսանկյունից այն հաշվետվության օր է՝ աշխատանքի արդյունավետության և ստեղծած արժեքի գնահատման պահ:

Վերջին շրջանում Հայաստանի սննդի արդյունաբերության ոլորտում նկատվում են դրական զարգացումներ և կառուցվածքային տեղաշարժեր։ Տեղական արտադրողների կողմից իրականացվող ներդրումները և արտադրական չափանիշների բարձրացումը նոր որակ են տալիս շուկային՝ տնտեսության մեջ մեծացնելով հայկական արտադրանքի կշիռը։

Այս միտումների համատեքստում հատկանշական են «Աթենք» մսամթերքի ընկերության արձանագրած ցուցանիշները։ ՀՀ Պետական եկամուտների կոմիտեի հրապարակած 2026 թվականի առաջին եռամսյակի տվյալներով՝ ընկերությունը զբաղեցրել է 1000 խոշոր հարկատուների ցանկի 27-րդ հորիզոնականը։ Սա փաստում է ընկերության կայուն զարգացման և սննդամթերքի արտադրության ոլորտում ունեցած նշանակալի դերի մասին։

Վերջին շրջանում արտադրական հզորությունների ընդլայնումն ու որակի վերահսկման միջազգային համակարգերի (ISO, HACCP) ներդրումը հնարավորություն են տվել ընկերությանը սահմանել սննդի անվտանգության նոր նշաձող՝ դրանով իսկ ամրապնդելով ու արդարացնելով սպառողների բազմամյա վստահությունը։ (Հիշեցնենք, որ նախորդ տարի ընկերությունը գործարկեց իր նոր՝ տարածաշրջանում նմանը չունեցող արտադրական համալիրը)։

«Աթենք»-ի ներդրումը պետական բյուջեում ունի հստակ սոցիալական հասցեատեր: Այն գումարները, որոնք ընկերությունը վճարում է որպես հարկ, վերածվում են ճանապարհների, դպրոցների, մանկապարտեզների և այլն: Սակայն Մայիսի 1-ի գլխավոր շահառուն աշխատող մարդն է: «Աթենք»-ի պարագայում գործ ունենք մի ընկերության հետ, որտեղ աշխատում է շուրջ 1600 աշխատակից: Ընկերությունն ապահովում է կայուն աշխատավարձ և մասնագիտական աճի այնպիսի միջավայր, որտեղ մարդն իրեն գնահատված է զգում: Հենց այս մարդկանց շնորհիվ է, որ հայկական արտադրանքը մրցունակ է դառնում նաև միջազգային հարթակներում: Ընկերության տնտեսական կայունությունն ու արձանագրած արդյունքները ամուր հիմք են ստեղծում նաև արտաքին շուկաներում դիրքերի ամրապնդման համար։ «Աթենք»-ի առաջիկա ծրագրերում առանցքային տեղ ունի արտահանման ծավալների ընդլայնումը և հայկական արտադրանքի ներկայացվածության մեծացումը միջազգային շուկաներում։ Սա ոչ միայն ընկերության զարգացման հաջորդ փուլն է, այլև կարևոր քայլ՝ ուղղված արտերկրում հայկական արտադրանքի վարկանիշի բարձրացմանը։

Հատկանշական է նաև, որ սննդամթերքի ներքին շուկայում առկա լայն ընտրության և ներկրված մսամթերքի հետ ակտիվ մրցակցության պայմաններում սպառողն ընտրում է տեղականը։ Սա վկայում է այն մասին, որ հայ սպառողի համար որոշիչ գործոն է դարձել ոչ թե պարզապես հայտնի անունը, այլ արտադրանքի թարմությունը, անվտանգության բարձր ստանդարտները և համային նախապատվությունները։ Ընկերությանը հաջողվել է տարիներ շարունակ ապացուցել, որ հայկական արտադրանքը ոչ միայն չի զիջում, այլև իր որակական և տեխնոլոգիական բնութագրերով գերազանցում է արտասահմանյան շատ հայտնի ընկերություններին։ Սա վստահության այն բարձր մակարդակն է, որը ձևավորվում է տարիների հետևողական աշխատանքի և սպառողի առջև բացարձակ պատասխանատվության շնորհիվ։

«Աթենք»-ի արձանագրած արդյունքները հայկական արտադրության մրցունակության յուրօրինակ ցուցիչ են՝ փաստելով, որ հետևողական աշխատանքի և ռազմավարական ներդրումների շնորհիվ հնարավոր է հասնել տնտեսական բարձր ցուցանիշների։