Մենք քաղաքական որևէ ժառանգության համար պատասխանատվություն չենք կրում, ընդամենը 8 ամիս ենք քաղաքականության մեջ․ Կարապետյան
«Մեր և իշխանության շանսերը շատ մոտ են միմյանց, բայց մենք ամեն ամիս տեսնում ենք մեր ուժի հանդեպ վերաբերմունքի փոփոխություն՝ բոլոր հարցումներով։ Սա է մեզ հիմք տալիս ՝տեսնելու, որ նոր փոփոխություն է լինելու երկրում»,- այս մասին լրագրողների հետ զրույցում ասաց «Ուժեղ Հայաստան» կուսակցության խորհրդի անդամ Նարեկ Կարապետյանը։
Նրա խոսքով՝ ՀՀ բնակչության 70 % ցանկանում է փոփոխություն։
«Իշխանության ամբողջ պոտենցիալը տեսել ենք, տեսել ենք՝ ութ տարում ինչ են արել և ինչ չեն արել։ Սա հանգեցրել է մեր հասարակության նշանակալի մասի շրջանում խորը հիասթափության»,- ասաց Կարապետյանը։
Նա նշեց, որ այսօր Աշտարակում է եղել, որտեղ մարդկանց նշանակալի մասն ուներ ընդդիմադիր հայացքներ։
«Այսօր 3-4 հոգով քայլում էինք և իրազեկման ակցիա էինա անում Աշտարակում։ Մարդկանց նշանակալի մասը ընդդիմադիր հայացքների տեր է։ 10-ից 7 ընդդիմադիր հայացք ունի, սակայն 7-ից 4-ը հավատը կորցրել է, որովհետև մի անգամ հավատացել է Փաշինյանին է և մտածում է, որ բոլոր քաղաքական գործիչներն էլ նույն ձև են։ Բայց ուզում եմ մեր այդ հայրենակիցներին մի բան հիշեցնել՝ մենք նոր ենք մտել քաղաքականություն։ Ութ ամիս է մենք քաղաքական պրոցեսների մասնիկ ենք։ Սամվել Կարապետյանը Հայաստանում քաղաքական պրոցեսների մեջ 8 ամիս է, մենք քաղաքական որևէ ժառանգության այս պահին պատասխանատվություն չենք կրում և չի եղել բան, որ Կարապետյանը ասի և Հայաստանի համար չանի»,- ասաց նա։
