LVMH-ը հայտնում է վաճառքի դանդաղման մասին. Իրանի դեմ պատերազմը հետաձգել է շքեղության շուկայի վերականգնումը
Культура
Աշխարհի ամենախոշոր շքեղ ապրանքների կոնգլոմերատ LVMH-ը հայտնել է առաջին եռամսյակում վաճառքների թույլ աճի մասին՝ կապելով դինամիկայի վատթարացումը Մերձավոր Արևելքում շարունակվող հակամարտության հետևանքների հետ, որը շարունակում է ճնշում գործադրել խմբի բիզնեսի հիմնական ուղղությունների վրա, գրում է Financial Times-ը։
LVMH-ի եկամուտները տարվա առաջին երեք ամիսներին համադրելի ցուցանիշներով աճել են ընդամենը 1%-ով՝ նախորդ տարվա նույն ժամանակահատվածի համեմատ և կազմել 19,1 միլիարդ եվրո՝ չարդարացնելով վերլուծաբանների սպասումները։ Միևնույն ժամանակ, հիմնական ստորաբաժանումը՝ նորաձևությունն ու կաշվե արտադրանքը, որի մեջ ներառված են Louis Vuitton և Dior բրենդերը, արձանագրել է 2% անկում՝ հասնելով 9,24 միլիարդ եվրոյի, ինչը դարձել է արդեն վաճառքների անկման յոթերորդ անընդմեջ եռամսյակը։
Ընկերությունը հայտարարել է, որ ԱՄՆ-Իսրայելական պատերազմը Իրանի դեմ էական ազդեցություն է ունեցել մարտ ամսվա արդյունքների վրա՝ նվազեցնելով վաճառքի աճը մոտ 3 տոկոսային կետով: LVMH-ը նաև նշել է, որ Պարսից ծոցի տարածաշրջանում, այդ թվում՝ Դուբայում, հրթիռային հարվածները նվազեցրել են գնորդների այցելությունները առևտրի կենտրոններ և զբոսաշրջային հոսքը: Ընդհանուր առմամբ՝ եռամսյակի ընթացքում հակամարտությունը «կերել» է խմբի եկամուտների աճի մոտ 1 տոկոսային կետ։
«Մերձավոր Արևելքում տեղի ունեցող հակամարտությամբ պայմանավորված՝ առանձնապես անկայուն աշխարհաքաղաքական և տնտեսական միջավայրի պայմաններում LVMH-ը պահպանում է զգոնությունը, սակայն շարունակում է վստահ լինել իր հեռանկարների նկատմամբ», — նշվում է ընկերության հայտարարության մեջ։
Արդյունքները հիասթափեցրել են շուկային, որը հույս ուներ, որ 2026 թվականին շքեղության ոլորտը կսկսի վերականգնվել երկարատև անկումից հետո՝ առաջատար նորաձևության տների ստեղծագործական տնօրենների փոփոխությունների ֆոնին։
Ֆրանսիացի միլիարդատեր Բեռնար Արնոյի ընտանիքի կողմից վերահսկվող LVMH-ի բաժնետոմսերը տարվա սկզբից արդեն կորցրել են գրեթե 25% արժեք։ Եռամսյակային հաշվետվության հրապարակումից հետո ընկերության ամերիկյան դեպոզիտար ստացականները նվազել են ևս 3,6%-ով՝ իջեցնելով նաև շքեղության ոլորտի մյուս ընկերությունների բաժնետոմսերի արժեքը։ Միևնույն ժամանակ, Մերձավոր Արևելքի հակամարտության ուղղակի ազդեցությունը շքեղության արդյունաբերության վրա գնահատվում է չափավոր․ այդ տարածաշրջանը ապահովում է համաշխարհային վաճառքների մոտ 5%-ը։
Սակայն վերլուծաբանները զգուշացնում են, որ հիմնական վտանգը երկարատև անկայունությունն է, որը կարող է թուլացնել սպառողական տրամադրությունները ամբողջ աշխարհում։ HSBC-ն արդեն նվազեցրել է շքեղության շուկայի աճի կանխատեսումը 2026 թվականի համար 1,1 տոկոսային կետով՝ հասցնելով այն 5,9%-ի՝ վկայակոչելով Եվրոպայում և Մերձավոր Արևելքում պահանջարկի թուլացումը։
Աշխարհագրական առումով LVMH-ը ցույց է տվել խառը ցուցանիշներ. ԱՄՆ-ում վաճառքը աճել է 3%-ով, մինչդեռ Ճապոնիայից դուրս Ասիայում այն աճել է 7%-ով՝ Չինաստանում երկարատև անկումից հետո։ Ի տարբերություն դրա, Եվրոպայում և Ճապոնիայում վաճառքը նվազել է 3%-ով։
Միակ կայուն աճ գրանցող ուղղությունը դարձել են ժամացույցներն ու ոսկերչական արտադրանքը՝ մասնավորապես Tiffany և Bvlgari բրենդերում, որտեղ վաճառքներն աճել են 7%-ով։
Վերլուծաբանները ակնկալում են, որ LVMH-ը կկարողանա մասնակիորեն փոխհատուցել անկումը՝ շնորհիվ նոր ստեղծագործական տնօրենների նշանակումների, այդ թվում՝ Ջոնաթան Անդերսոնի՝ Dior-ում և Մայքլ Ռայդերի՝ Celine-ում։
«Տնտեսական ընդհանուր պայմանների նորությունները հուսադրող չեն, սակայն ստեղծագործական ռազմավարության թարմացումը և ավելի գրավիչ գնային քաղաքականությունը պետք է նպաստեն իրավիճակի բարելավմանը»,-նշել է HSBC-ի վերլուծաբան Անն-Լոր Բիսմութը։
