Ամենաանարդյունավետ խորհրդարանը՝ ըստ պաշտոնական թվերի

Այս տարվա փետրվարի 19-ի դրությամբ՝ 8-րդ գումարման Ազգային ժողովն ընդունել է 2418 օրենք, հայտարարություն, նախագիծ, ընտրել անկախ մարմինների անդամներ։ Դրանցից 2272-ը օրենսդրական նախաձեռնություններ են։ Ըստ ԱԺ կայքում հրապարակված տվյալների՝ այդ նախաձեռնություններից միայն 6-ն են հեղինակել ընդդիմադիր խմբակցությունների պատգամավորները։

«Հայաստան» խմբակցությունը և նրա պատգամավորները 2025 թվականի դեկտեմբերի 16-ի դրությամբ ներկայացրել են 53 նախաձեռնություն։ Այդ նախաձեռնություններից ընդունվել է միայն 6-ը, մերժվել է 26 նախաձեռնություն, հեղինակի կողմից հետ է վերցվել 21 նախաձեռնություն։

«Պատիվ ունեմ» խմբակցության պատգամավորները հանդես են եկել 16 նախաձեռնությամբ։ Այդ նախաձեռնություններից 5-ը հեղինակների կողմից հետ են կանչվել, 1 նախաձեռնություն ընդունվել է, մնացած 10-ը՝ մերժվել։ Փաստորեն, այս խորհրդարանն աչքի է ընկել ընդդիմության նախաձեռնությունները տոտալ մերժելու, քաղաքական դիսկուրսը տապալելու քաղաքականությամբ։ Նույնիսկ այսպես կոչված՝ «նախկինների» օրոք նման ցուցանիշներ Ազգային ժողովը չի ունեցել, երբ իշխանությունը հրաժարվում էր գործակցել ընդդիմության հետ։

Իշխող ուժը տապալել է անգամ ոչ քաղաքական նախաձեռնությունները՝ պարզապես այն պատճառով, որ դրանց հեղինակն ընդդիմությունն է։ Արդյունքում, 8-րդ գումարման խորհրդարանը կարելի է համարել ամենավատը ՀՀ նորագույն պատմության ընթացքում։ Եվ դրա միակ մեղավորն ու պատասխանատուն «Քաղաքացիական պայմանագիրն» է։ Մինչ իշխող ուժը բողոքում է քաղաքական դիսկուրսի մակարդակի նվազումից, հենց իրենք են իջեցնում դրա մակարդակը։ Սա, ի դեպ, արվում է գիտակցված՝ ընդդիմության արդյունավետությունը հանրության աչքերում նվազեցնելու, վարկաբեկելու համար։

Եթե ՔՊ-ն հունիսյան ընտրություններից հետո շարունակի իշխել Հայաստանում, ապա կրկին ականատեսն ենք լինելու քաղաքականության վարկաբեկման, անհանդուրժողականության ու ատելության մթնոլորտի շիկացման, մինչդեռ Հայաստանին այսօր օդուջրի պես համաձայնություն, համերաշխություն և միահամուռ ուժերով պետության խնդիրների լուծում է հարկավոր։ Ընտրողը պիտի որոշի, թե որ ուժը կարող է դրանք բերել Հայաստանին։

Աննա Մարգարյան