Չինաստանից Ռուսաստան ուղարկված ծանրոցներում հայտնաբերվել են 30 կգ ռադիոակտիվ ուլունքներ
Международное
Ռուսաստանի Դաշնության Դաշնային մաքսային ծառայության (ԴՄԾ) Կազանի փոստային բաժանմունքի աշխատակիցները Չինաստանից ուղարկված ծանրոցներում հայտնաբերել են բիժուտերիայի պատրաստման համար նախատեսված 30 կգ ռադիոակտիվ ուլունքներ, հայտնում է ՏԱՍՍ-ը:
«Կազանի փոստային մաքսային կետի աշխատակիցները Չինաստանից ստացված ծանրոցներում հայտնաբերել են բիժուտերիայի պատրաստման համար նախատեսված 30 կգ ռադիոակտիվ ուլունքներ։ Ապրանքների գամմա-ճառագայթման մակարդակը նորման գերազանցել է ավելի քան 15 անգամ»,- ասվում է հաղորդագրության մեջ։
ԴՄԾ-ն պարզաբանել է, որ երկու փոստային առաքումները հասցեագրված են եղել Սանկտ Պետերբուրգի մի բնակչուհու։ Դրանցում եղել են զարդերի նախապատրաստուկներ՝ թելերի վրա շարված տարբեր գույների քարե ուլունքների տեսքով, որոնք փաթեթավորված են եղել 235 zip-փաթեթներում։ Ընդ որում, փաստաթղթերում ուղարկողը նշել է, որ տեղափոխում է ապակյա զարդեր։
«Ռադիացիոն հսկողության միջոցների գործարկումից հետո ստուգումը ցույց է տվել, որ փաթեթների մակերևույթին իոնացնող ճառագայթման մակարդակը կազմում է 1,23 մկԶվ/ժ: Սպեկտրոմետրիկ վերլուծությունը առարկաներում հայտնաբերել է տորիում-232 ($^{232}Th$) ռադիոակտիվ իզոտոպի պարունակություն և բետա-մասնիկներ»,- մանրամասնել են գերատեսչությունում։
Մաքսավորները արգելել են ապրանքի բացթողումը։ Ծանրոցները վերադարձվել են ուղարկող երկիր։
